У сакавіку гэтага года ў Нацыянальным аэрапорце «Мінск» мужчына праходзіў пагранічны кантроль на рэйс у Ташкент. Супрацоўнікам ён прад’явіў пашпарт грамадзяніна Расіі. Дакумент аказаўся чужым, паведамілі ў Мінскай транспартнай пракуратуры.
Як устанавіў суд, расіянін купіў падроблены пашпарт яшчэ на радзіме і планаваў выкарыстаць яго, каб вылецець ва Узбекістан. На допыце ён цалкам прызнаў віну.
Суд Кастрычніцкага раёна Мінска прызначыў яму пакаранне паводле часткі 1 артыкула 380 Крымінальнага кодэкса — тры месяцы арышту. Па законе за такое злачынства можна было атрымаць да двух гадоў абмежавання волі, але суд улічыў асобу абвінавачанага, змякчальныя абставіны і адсутнасць абцяжарвальных.
Калі б мужчына трапіўся з падробкай паўторна або дзейнічаў у групе, яму пагражала б ужо да трох гадоў калоніі.
