Дранік усяму галава

Воранава запрашае на бульба-фэст «Воранаўскі дранік» і мерапрыемствы, прысвечаныя 490-годдзю гарадскога пасёлка. Святочны дзень пачнецца ў 13.00 у скверы каля адміністрацыйнага будынка райвыканкама, дзе адбудзецца ўрачыстае адкрыццё культурна-асветніцкага цэнтра «Беларускі дранік».

Асноўныя мерапрыемствы пройдуць на стадыёне. Галоўная сцэна прыме ўдзельнікаў урачыстага віншавання Воранава з юбілеем, тут жа афіцыйна адкрыецца і сам бульба-фэст. На працягу дня гледачоў чакае насычаная музычная праграма.

Паралельна на іншых пляцоўках свята з 14.00 да 19.00 разгорнуцца майстар-класы па падрыхтоўцы дранікаў ад носьбітаў традыцый Гродзенскай вобласці, а таксама інтэрактыўны праект «Байк-дранік». Акрамя таго, прадпрыемствы Воранаўскага раёна прадставяць свае тэматычныя пляцоўкі з дэгустацыяй разнастайных страў з цёртай бульбы.

Летняя эстрада гарадскога пасёлка стане цэнтрам фестывалю гульні «Карнавал весялосці». У 12.00 адбудзецца яго ўрачыстае адкрыццё, з 12.15 да 16.00 пройдзе конкурсная праграма, а ў 16.30 — узнагароджанне ўдзельнікаў. Увечары тут пачнецца пенная дыскатэка ад студыі дзіцячых свят «Сюрпрыз».

Для актыўнага сямейнага адпачынку з 14:00 да 19:00 у Гарадскім парку будзе працаваць гульнявая пляцоўка «Дранік-ПІКНІК!». Аматараў рамёстваў і ўнікальных сувеніраў чакае «горад майстроў» і выстава-продаж на вуліцы Літоўчыка. Спартыўная рызыка захлісне вуліцу Юбілейную, дзе ў 16:00 пачнуцца спаборніцтвы па сілавым экстрыме «Вараноўскі асілак — 2026».
На працягу ўсяго бульба-фэсту для гасцей будуць даступныя дзіцячыя атракцыёны з 14.00 да 21.00, а святочны гандаль і рэстаран пад адкрытым небам забяспечаць усіх смачнымі пачастункамі з 14.00 да 23.00.

Узнагароджанне пераможцаў конкурсаў бульба-фэсту адбудзецца ўвечары на галоўнай сцэне. Потым тут працягнецца музычны марафон, кропку ў якім у 21.00 паставіць выступленне групы «На-На». Яскравым завяршэннем насычанага дня стануць святочны салют (пачатак у 22.00), канцэрт кавер-групы «Бандыты» і начная дыскатэка, якая працягнецца да дзвюх гадзін ночы.

Адрадзілі на радасць людзям

Сёлета «Ганненскі кірмаш» у Зэльве святкуе двайны юбілей: 305 гадоў з дня яго заснавання і 25 — з моманту адраджэння. З гэтай нагоды майстры зэльвенскага аддзела рамёстваў упершыню стварылі ўнікальны памятны аксесуар. Эксклюзіўны выраб ручной работы дазволіць кожнаму госцю павезці дадому часцінку жывой гісторыі і адчуць асабістае дачыненне да адраджэння народных традыцый.

У 12.00 на цэнтральнай плошчы разгорнецца напоўненае аўтэнтычным каларытам тэатралізаванае дзейства. Па добрай традыцыі на галоўнай сцэне пройдзе ўрачыстая цырымонія ўзнагароджання перадавікоў уборачнай кампаніі.

Сапраўдным упрыгожаннем свята стане захапляльнае коннае шоу, якое перанясе гледачоў у атмасферу адвагі і неверагоднага майстэрства. На пляцоўцы ва ўсёй красе паўстануць галавакружныя элементы: эфектная джыгітоўка і мастацкае вальтыжаванне. Экстрэмальныя трукі каскадзёраў зменяцца рамантычнымі коннымі прагулкамі для гасцей кірмашу.

Будуць арганізаваныя конкурсы сельскагаспадарчых падворкаў, кірмашовых інсталяцый і касцюміраваных калектываў. Таксама падвядуць рэйтынг на званне самага актыўнага пакупніка, вызначаць найлепшага прадаўца-аматара і знойдуць самы арыгінальны сімвал свята, прадстаўлены ў розных тэхніках дэкаратыўна-прыкладнога мастацтва.

Упершыню для аматараў стрыт-арта і сучаснага візуальнага мастацтва будзе арганізаваны арыгінальны конкурс па роспісе саламяных цюкоў. Разгорнецца ўнікальная рэтраспектыўная выстаўка пад адкрытым небам, на якой збяруць лепшыя работы пераможцаў і ўдзельнікаў фестывалю за 25 гадоў. Гэта экспазіцыя стане жывой храналогіяй свята і пакажа, як развіваліся народная творчасць і рамёствы за чвэрць стагоддзя.

Лепшыя народныя майстры з усёй Беларусі збяруцца на адкрыты конкурс-пленэр па саломапляценні «Саламяны цуд». Аматараў здаровага ладу жыцця аб’яднае міжнародны адкрыты турнір па гіравым спорце «Андрэй запрашае сяброў!», за перамогу ў якім будуць змагацца атлеты з некалькіх краін. Напярэдадні свята на вадасховішчы пройдзе конкурс «Беларуская рыбачка», прымеркаваны да Года беларускай жанчыны.

На працягу дня будуць працаваць гандлёвыя і рамесныя рады, дзіцячыя атракцыёны. Вулічныя музыканты, мастакі, аніматары, цыркавыя артысты і тэатральны калектыў створаць непаўторную атмасферу свята. Аматарам добрай музыкі прапануюць разнастайную праграму з удзелам прафесійных творчых калектываў, якая, несумненна, падорыць станоўчыя эмоцыі і незабыўныя ўражанні. А на «дэсерт» — феерычнае вогненнае шоу.

Вераніка КАЗЛОЎСКАЯ
Фота з адкрытых інтэрнэт-крыніц