У Генеральнай пракуратуры праходзіць міжведамасная нарада па тэме «Стан кіберзлачыннасці і крыміналагічны прагноз яе дынамікі. Праблемныя пытанні процідзеяння злачынствам, якія ўчыняюцца з выкарыстаннем інфармацыйна-камунікацыйных тэхналогій». «Сёння мы абмяркуем пытанне ініцыявання прыняцця закона, накіраванага на супрацьдзеянне кіберзлачыннасці і кіберпагрозам», — сказаў Дзмітрый Гара.

Генпракурор звярнуў увагу на пагрозу, якая захоўваецца і зыходзіць ад гэтага віду злачынстваў. «Мы бачым, што ў нас у цэлым у краіне ідзе істотны спад агульнакрымінальнай злачыннасці. Гэта вынік работы праваахоўных органаў. У той жа час, нягледзячы на тое, што мы зафіксавалі ў 2025 годзе ў параўнанні з 2024-м невялікае зніжэнне зарэгістраваных злачынстваў у сферы інфармацыйна-камунікацыйных тэхналогій: з каля 20 тыс. да прыкладна 19 тыс., мы адзначаем рост колькасці асоб, якія пацярпелі ад гэтых злачынстваў (гэта ўжо каля 22 тыс.), а таксама невялікі рост прычыненай шкоды гэтымі злачынствамі — каля 80 млн рублёў. У гэтым годзе таксама несуцяшальныя тэндэнцыі. Па выніках першых двух месяцаў мінулага года было зарэгістравана каля 2,5 тыс. злачынстваў гэтай катэгорыі, а за студзень — люты гэтага года — ужо больш як 3,1 тыс. (рост 22 %)», — адзначыў ён.