Асновай выставы стаў зварот да традыцыі беларускай маляванкі, яе самабытнага вобразнага свету і выразнай мастацкай мовы. «Маляванка, вядомая як дэкаратыўны роспіс на тканіне, атрымала шырокае распаўсюджванне ў Беларусі ў канцы XIX — першай палове XX стагоддзя і стала яркай з’явай народнага дэкаратыўнага мастацтва. Райскія сады і фантастычныя жывёлы, кветкі і птушкі, замкі, месяцовыя і зорныя пейзажы — у творах народных мастакоў рэальнасць злучаецца з фантазіяй, ствараючы асаблівы, ідэалізаваны свет», — падкрэслілі арганізатары. 

Аднак экспазіцыя не абмяжоўваецца традыцыйнымі матывамі і тэхнікамі. Праз стварэнне райскіх садоў і фантастычных пейзажаў, населеных рознымі істотамі, майстры маляванкі перадавалі сваё ўяўленне аб ідэальным свеце. Студэнты, звяртаючыся да гэтай спадчыны, працягваюць развіваць свабоду творчасці, прыўносячы ў жыццё ўласныя сюжэты і сэнсы, сугучныя свайму часу.

На кафедры дэкаратыўна-прыкладнога мастацтва і касцюма вывучэнне маляванкі на працягу многіх гадоў развіваецца ў рамках аўтарскага курсу мастака тэкстылю, дацэнта Маргарыты Шчамялёвай. «У аснове яе педагагічнага падыходу ляжыць паглыбленне ў гістарычны матэрыял. Выстава дазваляе прасачыць гэты шлях - ад дэталёвага вывучэння крыніцы да самастойнага мастацкага выказвання. Экспазіцыя ўключае як рэканструкцыі гістарычных маляванак, так і аўтарскія работы студэнтаў і выпускнікоў, у якіх зварот да традыцыі ўзбагачаецца сучаснымі сродкамі жывапісу, ручнога ткацтва, лічбавай графікі, мастацкага тэкстылю і касцюма», — адзначылі ў галерэі.