На пасяджэнні пастаяннай міжведамаснай камісіі па дзяржаўных праграмах, удзел у якім прынялі міністр эканомікі Юрый Чабатар, прадстаўнікі Мінінфарма, Мінпрацы і сацабароны, Дзяржаўнага пагранічнага камітэта, Дзяржаўнага мытнага камітэта, разгледзелі справаздачы аб рэалізацыі дзяржпраграм «Рынак працы і садзейнічанне занятасці», «Масавая інфармацыя і кнігавыданне», «Урэгуляванне надзвычайных сітуацый», «Інфраструктура пунктаў пропуску на дзяржаўнай граніцы Рэспублікі Беларусь» на 2021 — 2025 гады.
Як адзначыла намеснік кіраўніка эканамічнага ведамства Марыя Мажынская, у мінулым пяцігоддзі дзяржава актыўна інвесціравала ў эфектыўную занятасць.
— За пяць гадоў садзейнічанне ў працаўладкаванні атрымалі звыш 630 тысяч чалавек, каля 13,5 тысячы беспрацоўных прайшлі прафесійную падрыхтоўку, перападрыхтоўку і павышэнне кваліфікацыі, каля 5 тысяч беларусаў атрымалі субсідыю на адкрыццё сваёй справы, больш за 500 сем’ям аказана садзейнічанне ў пераездзе на новае месца жыхарства і працы, — расказала Марыя Мажынская.
Па словах намесніка міністра эканомікі, вялікая работа праведзена ў рамках рэалізацыі разгляданых дзяржпраграм. Напрыклад, развіццё пагранічнай інфраструктуры: выкананне мерапрыемстваў профільнай дзяржпраграмы дазволіла рэканструяваць 13 аўтадарожных пунктаў пропуску, нарасціўшы іх прапускную здольнасць.
— Такія ўкладанні ўмацоўваюць транзітны патэнцыял Беларусі і спрыяюць фарміраванню спрыяльнага іміджу нашай краіны для турыстаў, — падкрэсліла яна.
