Папярэднія ацэнкі паказвалі на тое, што глабальная эканамічная шкода ад прыродных катастроф — такіх як землетрасенні, апоўзні і паводкі — складае каля 200 мільярдаў долараў у год. Але, па словах Джэнты Кірш-Вуд, кіраўніка аддзела глабальнага аналізу рызык і справаздачнасці Упраўлення ААН па зніжэнні рызыкі бедстваў, гэта «толькі малая частка шкоды», а рэальны паказчык набліжаецца да 2,3 трыльёна долараў.

Яна заявіла журналістам, што свет «хранічна недаацэньвае і недастаткова вымярае агульны ўплыў бедстваў» на дасягненне Мэт устойлівага развіцця.

Паводле слоў прадстаўніцы ААН, надзвычайныя сітуацыі ўсё часцей закранаюць ахову здароўя, адукацыю і рынак працы, што вядзе да росту дзяржаўнага доўгу і зацягвання аднаўлення ў краінах, якія ўжо знаходзяцца ва ўразлівым становішчы. Гэта, у сваю чаргу, прыводзіць да сацыяльных праблем, паколькі дзяржавы ўсё часцей сутыкаюцца з экстрэмальнымі кліматычнымі з’явамі.

Паводле дадзеных ААН, фінансавыя страты ад бедстваў падвоіліся за апошнія два дзесяцігоддзі. 

Большасць выдаткаў ад кліматычных бедстваў можна прадухіліць, падкрэслівае Кірш-Вуд. У будучыні асноўная задача — «лепш узгадняць работу фінансавых сістэм» і «прыцягваць дзяржаўныя і прыватныя інвестыцыі, каб аптымальна змяншаць нагрузку на ўрады».