Вольга Хургіна адзначыла, што ў Мінску на Гурскага, 42 размешчана прадпрыемства «Фаўна горада», якое займаецца адловам бяздомных жывёл. «Адлоў праводзіцца гуманнымі спосабамі. Усіх жывёл, якія трапляюць да нас, мы рэгіструем, фатаграфуем, размяшчаем фатаграфіі на нашым сайце, у нашых сацсетках і актыўна займаемся пошукам новых уладальнікаў. Жывёлы на нашым прадпрыемстве не падвяргаюцца эўтаназіі. Калі ў нас няма месцаў прыняць усіх, мы ўсё роўна знаходзім рэзервы. Жывёлы знаходзяцца ў нас да таго моманту, пакуль не трапяць у новую сям’ю», — расказала яна.

Намеснік дырэктара падкрэсліла, што вялікі горад — гэта не месца, дзе жывёлам камфортна жыць на вуліцы. «Кожны год мы падбіраем загінулых жывёл, гэта не толькі каты і сабакі. Жывёлы на вуліцах з хваробамі, і іх ніхто не лечыць. Зімой ім холадна, летам складана знайсці чыстую ваду. „Фаўна горада“, вядома, не дом, мы з’яўляемся пунктам часовага ўтрымання, але ў нас усе жывёлы размешчаны ў бяспечных умовах, яны ўсе забяспечаны вадой, ежай, бяспечным выгулам, ветэрынарным суправаджэннем. У мінулым годзе мы адлавілі больш за 1,3 тыс. катоў і сабак. З пачатку бягучага года — ужо 821 жывёліну. Інакш кажучы, тэндэнцыя да зніжэння ёсць. Можа, гэта сведчыць аб тым, што людзі пачалі адносіцца да гадаванцаў больш адказна», — канстатавала Вольга Хургіна.

Паводле яе слоў, заяўкі на адлоў жывёл паступаюць ад ЖКГ, МУС, калі экстранная заяўка, то можа і ад МНС. «У нас ёсць планавыя выезды па графіку — адзін раз у месяц мы бываем у кожным сталічным ЖЭС. Гэта абавязковая працэдура для таго, каб у працэсе маніторынгу выявіць безнаглядных жывёл або месцы кармлення. Ёсць таксама і экстранныя заяўкі, напрыклад, адбыўся пакус. Тады, вядома, мы выязджаем адразу», — праінфармавала намеснік дырэктара прадпрыемства.

«Фаўна горада» займаецца адловам жывёл не толькі на тэрыторыі сталіцы. «Калі ў нас ёсць свабодныя месцы, мы аказваем паслугі яшчэ і Мінскаму раёну і Мінскай вобласці. Таму суадносіны жывёл у нас, як правіла, складаюць 50 на 50», — дадала Вольга Хургіна.

Штат прадпрыемства налічвае 42 чалавекі, працуюць пяць экіпажаў адлову жывёл, чатыры работнікі даглядаюць гадаванцаў. «Мы працуем без выхадных. Ёсць у нас валанцёры, якія дапамагаюць, у спісе 15 чалавек, яны прыходзяць пастаянна, фатаграфуюць жывёл і размяшчаюць фота ў сваіх сацыяльных сетках, займаюцца пошукам уладальнікаў. Таксама яны дапамагаюць выкормліваць маленькіх кацянят і шчанят, якіх трэба карміць кругласутачна», — адзначыла яна.