Рэспубліканская дыктоўка пройдзе ўжо чацвёрты раз. «Першыя тры гады яго тэкст дыктаваў прадстаўнік Саюза беларускіх пісьменнікаў. У гэтым годзе мы вырашылі трохі абнавіць яго форму. Тэкст будзе дыктаваць адзін з папулярных беларускіх маладзёжных блогераў. Імя пакуль пакінем у таямніцы. Гэта акцёр, вядучы, дыктар, відэаграф. Пройдзе дыктоўка 16 верасня (пачатак у 11.00). Трансляцыя будзе весціся з Нацыянальнай бібліятэкі, далучыцца да яе можна будзе на YouTube-канале Moladz.by і ў жывым эфіры тэлеграм-канала Moladz.by», — расказаў Аляксандр Елісееў. 

Тэкст для дыктоўкі рыхтуе акадэмія адукацыі. «Ён традыцыйна будзе на беларускай мове і прысвечаны тэме патрыятызму, аб’яднанню краіны і пытанням гістарычнай памяці. Усе ўстановы вышэйшай адукацыі, а таксама школы падключацца да трансляцыі анлайн. У далейшым мы выкладзем поўны тэкст дыктоўкі, і ўдзельнікі змогуць праверыць сябе на памылкі. У цэлым складанасць тэксту сярэдняя, арыентаваная на школьнікаў 10-11-га класа. Хачу падкрэсліць, што ўдзельнічаць у дыктоўцы можа любы жадаючы, трансляцыя даступная ўсім. Таму калі хтосьці сам хоча паўдзельнічаць, ён падключаецца да трансляцыі, піша дыктоўку і правярае сябе», — праінфармаваў намеснік начальніка маладзёжнага цэнтра. 

Ён адзначыў, што галоўная мэта мерапрыемства — папулярызаваць свята. «А таксама яшчэ раз нагадаць пра значнасць Дня народнага адзінства і з дапамогай тэксту лішні раз нагадаць яго сутнасць і тыя пастулаты, на якія ён абапіраецца», — дадаў Аляксандр Елісееў