Робаты-сабакі імкліва ўваходзяць у паўсядзённае жыццё кітайцаў, дэманструючы дзіўную разнастайнасць прымянення — ад прамысловага кантролю да догляду пажылых людзей і правядзення экскурсій, перадае «Жэньмінь жыбаа» анлайн». 

Робаты-сабакі актыўна ўкараняюцца ў розныя прафесійныя сферы. У Пекіне яны патрулююць лясы разам з пажарнымі, у порце Чжоўшань горада Нінбо (правінцыя Чжэцзян, Паўднёва-Усходні Кітай) праводзяць мытны кантроль кантэйнераў, а ў горадзе Цындаа (правінцыя Шаньдун, Усходні Кітай) дапамагаюць выратавальным службам, працуючы да чатырох гадзін без падзарадкі.

Асабліва ўражвае «водны разведчык» з Ханчжоу (правінцыя Чжэцзян) — першая ў краіне платформа маніторынгу якасці вады, здольная пераадолець да 20 км на адной зарадцы і за 5 хвілін вызначыць ключавыя паказчыкі. У гарах Тайшань у правінцыі Шаньдун робаты-сабакі выступаюць у ролі «разумных насільшчыкаў»: яны пераносяць грузы да 120 кг і значна павышаюць эфектыўнасць уборкі смецця.

У паўсядзённым жыцці робаты-сабакі становяцца надзейнымі памочнікамі для пажылых людзей. 83-гадовая жыхарка горада Ханчжоу рэгулярна «запрашае» свайго робата-кампаньёна Сяосі скласці ёй кампанію на прагулцы. 14-кілаграмовы памочнік з аптэчкай нагадвае аб прыёме лекаў, рэкамендуе меню і можа падаваць ежу. Дзякуючы 3D-камерам ён распазнае перашкоды і рухі чалавека, падаючы сігнал трывогі пры падзенні пажылога чалавека.

У школах Кітая робаты-сабакі праводзяць зарадку, дэманструюць танцы і выступаюць у ролі трэнераў: яны аўтаматычна рэгулююць тэмп практыкаванняў і дапамагаюць вучням захоўваць правільную выправу, абуджаючы цікавасць да навукі і тэхналогій.

Турыстычная індустрыя ператварыла робатаў-сабак у сапраўдных зорак забаў. У маляўнічым раёне Шаньхайгуань горада Цыньхуандаа (правінцыя Хэбэй, Паўночны Кітай" металічныя танцоры ў касцюмах ільвоў выконваюць традыцыйны танец пад барабаны, узаемадзейнічаючы з захопленымі турыстамі.

У турыстычнай зоне Хэбаньшань у Шаньдуне два робата-сабакі працуюць гідамі, яны праводзяць наведвальнікаў па горных сцежках. У музеі геалогіі правінцыі Гуйчжоу (Паўднёва-Заходні Кітай) цэлая група робатаў праводзіць экскурсіі — у кожнага свой характар: адны выдатна гавораць на карэйскай, іншыя — з паўночна-ўсходнім акцэнтам, трэція паводзяць сябе весела, а некаторыя, наадварот, больш стрыманыя.

Спартыўныя мерапрыемствы таксама не абыходзяцца без чатырохногіх памочнікаў. На марафоне ў горадзе Чунцын (Паўднёва-Заходні Кітай) робаты-сабакі не толькі забаўлялі гледачоў танцамі, але і дастаўлялі спартсменам ваду і харчаванне прама на дыстанцыю, ствараючы ўнікальную атмасферу высокатэхналагічнага забегу.

Па звестках Tmall, адной з найбуйнейшых інтэрнэт-пляцовак Кітая, з сакавіка пошукавыя запыты «робаты, абсталяваныя ШІ» выраслі ў 21 раз, а продажы толькі за перыяд распродажу з 27 лютага па 8 сакавіка — на 400%. Пры гэтым чацвераногія робаты-сабакі сталі яркім хітом продажаў. Як прагназуюць эксперты, да 2030 года сусветны рынак чатырохногіх робатаў перавысіць 8 млрд. юаняў, а іх продажы — больш за 560 тыс. адзінак.