Гэта аўтаномны патрульны робат са штучным інтэлектам, распрацаваны кампаніяй Zhejiang Supcon Information Technology. Ён бярэ на сябе руцінную работу на скрыжаваннях, каб разгрузіць паліцыю. Яго выкарыстоўваюць на дарогах і магістралях у рамках праграмы «разумны горад».

Што ўмее гэты робат

Робат паказвае стандартныя жэсты, арыентуючыся на сігналы святлафора, і выкарыстоўвае электронны свісток. Акрамя таго ён сочыць за веласіпедыстамі і самакатчыкамі. Дзякуючы камерам з ШІ ён выяўляе язду без шлема, перагруз, няправільную паркоўку і пераход дарогі ў неналежным месцы.

Таксама дзякуючы нейрасетцы робат адказвае на пытанні ўдзельнікаў дарожнага руху, можа дапамагчы скласці маршрут да зададзенага пункта або выклікаць дапамогу.

Як правіла, робат робіць да 3500 галасавых заўваг у дзень, а таксама праводзіць звыш 500 дыялогаў з грамадзянамі.

Зараз у Ханчжоу працуюць 15 такіх робатаў. Яны могуць працаваць па 8 гадзін без падзарадкі. Агулам механізмы ўжо адпрацавалі больш за 10 000 гадзін, дапамагаючы паліцыі на марафонах, уступных іспытах і ў святы.