Сяргей Рутэнка адзначыў, што на пасяджэнні выканкама Міжнароднай федэрацыі баскетбола (ФІБА) былі зняты толькі персанальныя абмежаванні ў адносінах да беларускіх і расійскіх баскетбалістаў, трэнераў, суддзяў, камісараў і іншых афіцыйных асоб. Гэта датычыцца, як класічнага баскетбола 5×5, так і баскетбола 3×3. Паводле слоў Сяргея Рутэнкі, пытанне аб поўным вяртанні зборных і клубаў Беларусі і Расіі плануецца разгледзець у снежні 2026 года на пасяджэнні Цэнтральнага савета Міжнароднай федэрацыі баскетбола.

Раней ФІБА дапусціла да міжнародных турніраў беларускія маладзёжныя каманды па баскетболе 3×3. Першым спаборніцтвам для беларусаў стаў турнір Лігі нацый, які прайшоў у ліпені ў Малайзіі. Па выніках жаночых спаборніцтваў зборная Беларусі (U-21) набрала 510 рэйтынгавых ачкоў і заняла другое месца, прапусціўшы наперад японак. Мужчынская «маладзёжка» заняла чацвёртае месца. Гэтыя турніры былі адборачным этапам да маладзёжнага чэмпіянату свету па баскетболе 3×3.