Адносіны Беларусі і М’янмы развіваюцца дынамічна і паступальна. Аб гэтым заявіў міністр замежных спраў Беларусі Максім Рыжанкоў на другім пасяджэнні сумеснага беларуска-м’янманскага камітэта па гандлёва-эканамічным супрацоўніцтве, паведамляе БелТА.
«Мы ў Беларусі вельмі рады, як паступальна і дынамічна развіваюцца нашы адносіны з М’янмай, — сказаў Максім Рыжанкоў. — Толькі за апошнія дзевяць месяцаў адбылося пяць сустрэч лідараў нашых краін, на якіх абмяркоўваўся ўвесь комплекс двухбаковых адносін і быў дадзены выразны сігнал усім нам да выбудоўвання двухбаковага супрацоўніцтва ва ўсіх галінах адносін».
У сувязі з гэтым кіраўнік беларускага МЗС нагадаў аб тым, што 7 сакавіка адбыліся перагаворы Прэзідэнта Беларусі Аляксандра Лукашэнкі са Старшынёй Дзяржаўнага адміністрацыйнага савета, прэм’ер-міністрам Рэспублікі Саюз М’янма Мін Аун Хлайнам у Мінску. Максім Рыжанкоў адзначыў, што ў ходзе гэтага візіту былі вызначаны магістральныя задачы супрацоўніцтва дзвюх краін.
«Рэалізацыя дамоўленасцяўй паўплывала непасрэдна і на развіццё гандлёва-эканамічных задач паміж нашымі краінамі, якія апошнім часам паказалі значны рост па ўсім комплексе таварных пазіцый. Павялічыўся і аб’ём закупляемых тавараў у М’янме, што з’яўляецца вельмі добрай дэманстрацыяй узаемавыгаднага гандлю паміж нашымі краінамі», — падкрэсліў ён.
Паводле слоў Максіма Рыжанкова, у пакеце дамоўленасцей знаходзяцца ініцыятывы па ўзаемадзеянні ў розных сферах: ад сельскай гаспадаркі да прамысловасці, ад адукацыі да міжчалавечых кантактаў. Ён запэўніў, што беларускі бок гатовы да яшчэ больш цеснага супрацоўніцтва з М’янмай па ўсіх кірунках і выслухае любыя цікавыя прапановы ад м’янманскіх сяброў.
Да пачатку пасяджэння сумеснага камітэта па гандлёва-эканамічным супрацоўніцтве Максім Рыжанкоў правёў сустрэчу ў вузкім складзе з міністрам інвестыцый і знешнеэканамічных адносін Рэспублікі Саюз М’янма Ва Ва Маун. Звяртаючыся да яе, кіраўнік МЗС звярнуў увагу, што апошнім часам вельмі шмат прадстаўнікоў розных міністэрстваў і ведамстваў Беларусі і М’янмы працуюць над тым, каб развіваць адносіны дзвюх краін.
«Галоўная задача ўскладзена на нас як на сустаршынь камісіі па гандлёва-эканамічным супрацоўніцтве. Мы павінны сабраць разам усе ідэі, праекты, прапановы і дабіцца іх рэалізацыі», — падкрэсліў Максім Рыжанкоў.
