«Наша пляцоўка не палітызавана, у адрозненне ад некаторых канферэнцый або дыялогавых платформ, якія існуюць цяпер. Напрыклад, той жа Мюнхенскі дыялог. Там жа вельмі прынцыпова падыходзяць да таго, хто да іх прыедзе, што ён будзе гаварыць, там моцная цэнзура. А наша пляцоўка прадастаўляе слова ўсім. Нават калі нехта прыехаў з думкамі, якія не ўкладваюцца ў наша разуменне рэгіянальнага парадку дня, пытанняў бяспекі і стабільнасці, хоча прапагандаваць вайну, тут таксама знойдзецца магчымасць для выказвання яго думкі. Але ён тут жа атрымае адпаведныя пытанні ад іншых. Яму давядзецца даваць тлумачэнні», — сказаў кіраўнік МЗС.

Як заўважыў міністр, на такую дыскусію існуе запыт. Вельмі шмат людзей, асабліва на тэрыторыі Еўрасаюза, проста хацелі б выказаць сваё меркаванне, але пляцоўкі для гэтага няма. «Гэтыя людзі таксама бачаць тыя праблемы, якія сёння існуюць, і не хочуць іх замоўчваць, таму што вынікі могуць быць драматычныя не толькі для рэгіёна, але і для ўсяго чалавецтва. Аб гэтым учора вельмі выразна гаварыў Прэзідэнт Беларусі. Таму каштоўнасць нашай пляцоўкі ўзрастае», — адзначыў Максім Рыжанкоў.

У прыватнасці, міністр указаў, што ў Мінску не супраць таго, каб у канферэнцыі прымаў удзел і ўкраінскі бок. «Абсалютна слушна, што рэгіянальны парадак дня сёння немагчымы без абмеркавання ўкраінскага пытання. І я не прыхільнік таго, каб гаварыць аб нейкай краіне без яе, але цяпер яна сама не хоча прысутнічаць пры такой размове. Калі яны будуць гатовы, то, вядома, для іх усе дзверы адчынены», — падкрэсліў кіраўнік знешнепалітычнага ведамства.

Таксама ён звярнуў увагу, што Мінская канферэнцыя кожны год прырастае і колькасцю, і ўзроўнем удзельнікаў. «Я баюся, што мы ў бліжэйшы час можам сутыкнуцца з тым, што нават давядзецца неяк выбарачна падыходзіць (да запрашэння ўдзельнікаў. — Заўвага БелТА). Хоць гэтага вельмі не хацелася б, таму што для нас важны голас кожнага. Думаю, што мы пастараемся знайсці нейкія фарматы, якія дадуць магчымасць нам нават пры павелічэнні попыту ўсё роўна захаваць магчымасць прыезду большай колькасці экспертаў. Мы можам, напрыклад, праводзіць нейкія асобныя сектаральныя дыскусіі па розных пытаннях. Ці можна праводзіць мерапрыемствы, падобныя да тых, якія мы нядаўна арганізавалі сумесна з ШАС і АДКБ», — сказаў міністр.

Кіраўнік беларускага знешнепалітычнага ведамства падкрэсліў, што такія мерапрыемствы неабходны, таму што бяспека можа гарантаваць толькі дыялог усіх бакоў. «На Мюнхенскай або Варшаўскай канферэнцыях разглядаюцца пытанні з пункту гледжання перш за ўсё краін Заходняй Еўропы. Акрамя таго, там часам акцэнт робіцца на забеспячэнні бяспекі за кошт іншых: нашай краіны, Расіі, Кітая, Ірана і іншых дзяржаў. Гэтым мы вельмі незадаволены. Наша ж пляцоўка з’яўляецца кансалідуючай. Мы не вылучаем нейкія групы краін, рэгіёны. Мы разглядаем пытанні еўразійскай бяспекі ў кантэксце ўсяго нашага вялізнага рэгіёна і лічым, што толькі сінергія заходняй і ўсходняй яго частак, скажам так, суперкантынентальнае ўзаемадзеянне можа прывесці да патрэбнага ўзроўню стабільнасці на ўсім кантыненце», — рэзюмаваў кіраўнік МЗС.