Кіраўнік знешнепалітычнага ведамства падкрэсліў: «Ініцыятыва, звязаная з Беларуссю, апошнім часам прыцягвае вялікую цікавасць. Гэта ідэя распрацоўкі Еўразійскай хартыі разнастайнасці і шматпалярнасці ў XXI стагоддзі. Упершыню яна была агучана на Міжнароднай канферэнцыі па еўразійскай бяспецы, якая адбылася ў Мінску ў кастрычніку 2023 года, калі Рэспубліка Беларусь прапанавала распрацаваць Еўразійскую хартыю «як кіраўніцтва для нашай уласнай кансалідацыі і агульнага прагрэсіўнага развіцця».

Міністр звярнуў увагу на тое, што ініцыятыва не ўзнікла на пустым месцы. «Хутчэй яна была выклікана рэальнымі геапалітычнымі патрэбамі і памкненнямі, — выказаў меркаванне Максім Рыжанкоў. — Больш за тое, ініцыятыва лагічна выцякала з іншай важнай ініцыятывы Беларусі, якая заклікала краіны свету прызнаць разнастайнасць шляхоў да прагрэсіўнага развіцця. Гэты заклік упершыню прагучаў з вуснаў Прэзідэнта Беларусі Аляксандра Лукашэнкі на саміце ААН у 2005 годзе». 

«Ініцыятыва «разнастайнасці» была вылучана ў перыяд глабальнай нявызначанасці, якая ўзнікла ў выніку так званага аднапалярнага моманту са спадарожнай яму аднабаковасцю і ігнараваннем міжнароднага права, — працягнуў кіраўнік ведамства. — У гэтай сувязі з дапамогай сваёй ініцыятывы Беларусь імкнулася ўнесці ўклад у намаганні іншых дзяржаў, накіраваныя на фарміраванне справядлівага міжнароднага парадку дня, у якім краіны маглі б жыць у міры і рэалізоўваць свае памкненні».

Як лічыць Максім Рыжанкоў, па сутнасці, сённяшні свет стаў нават яшчэ больш нестабільны, чым свет чатырохдзесяцігадовай даўнасці, таму што, нягледзячы на ідэалагічнае і геапалітычнае саперніцтва, Савецкаму Саюзу і Злучаным Штатам тады ўдавалася суіснаваць у свайго роду раўнавазе, якая забяспечвала стабільнасць і прадказальнасць, неабходныя для міру і развіцця. Але беспарадак, створаны ў часы аднапалярнага моманту - войны, канфлікты, грубыя парушэнні міжнароднага права, масавае перамяшчэнне людзей, — усё яшчэ пераважае па прычыне ўзмацнення аднабаковых падыходаў у знешняй палітыцы заходніх краін.

Міністр замежных спраў Беларусі адзначыў: «На гэтым фоне Беларусь выступіла з ідэяй распрацаваць Еўразійскую хартыю. Ініцыятыва грунтуецца на шматлікіх папярэдніх намаганнях Беларусі, акрамя ініцыятывы "разнастайнасці", такіх як, сярод іншага, нядаўні заклік Аляксандра Лукашэнкі да правядзення глабальнага дыялогу па бяспецы ў сапраўдным духу Сан-Францыска. Усе гэтыя ініцыятывы маюць на мэце ўнесці ўклад у намаганні па пабудове больш бяспечнага свету ў цэлым і Еўразіі ў прыватнасці».

Максім Рыжанкоў таксама падкрэсліў, што ідэя хартыі ўжо абмяркоўвалася на некаторых міжнародных форумах і назіраецца ўстойлівы рост цікавасці да гэтай ініцыятывы. Немалаважна, што Прэзідэнты Беларусі і Расіі таксама выказаліся ў падтрымку ідэі ў сваіх публічных заявах. 

Беларусь і Расія выказалі свае «папярэднія погляды» на хартыю ў дакуменце пад назвай «Агульнае бачанне Еўразійскай хартыі разнастайнасці і шматпалярнасці ў XXI стагоддзі». 

«У гэтым дакуменце дзве краіны паказалі, сярод іншага, як яны разглядаюць разнастайнасць і шматпалярнасць, як ацэньваюць ролю Еўразіі і яе ўплыў на сусветныя працэсы і што збіраюцца зрабіць для рэалізацыі сумеснага бачання», — звярнуў увагу міністр замежных спраў Беларусі.