У маі былі адкліканыя ліцэнзіі ў 207 урачоў з Украіны, якія не пацвердзілі валоданне польскай мовай.

«Урачы, якія не з’яўляюцца грамадзянамі Еўрапейскага саюза і якія атрымалі ўмоўную ліцэнзію на практыку ў Польшчы падчас пандэміі COVID-19, а затым, пасля пачатку ваенных дзеянняў ва Украіне, павінны былі падаць даведку аб валоданні польскай мовай узроўню B1 да канца красавіка. У тых, хто не падаў дакумент своечасова, рэгіянальныя медыцынскія палаты пачалі адклікаць ліцэнзіі на работу ўрачамі ў Польшчы», — адзначае газета.

Сітуацыя стварае чарговую праблему для польскіх бальніц, раней, у прыватнасці, недахоп персаналу папаўнялі ўрачамі з Украіны. Старшыня Вышэйшага медыцынскага савета Польшчы Лукаш Янкоўскі ў гутарцы з Rzeczpospolita падкрэсліў, што гэтая праблема можа адмоўна адбіцца на тысячах замежных урачоў.

У канцы красавіка ў Польшчы прайшла агульнанацыянальная акцыя пратэсту «Чорны тыдзень», арганізаваная Нацыянальнай асацыяцыяй работадаўцаў раённых бальніц. Да ініцыятывы далучыліся мясцовыя органы ўлады і медыцынскія ўстановы, якія выказвалі занепакоенасць пагаршэннем фінансавага становішча раённых бальніц і ростам сістэмных праблем у ахове здароўя.

Удзельнікі акцыі назвалі сітуацыю, якая склалася, выключна складанай. Адзначалася таксама, што найбольш трывожныя наступствы адчуваюць пацыенты. Павелічэнне часу чакання, абмежаваны доступ да спецыялістаў, праблемы з персаналам і рызыка абмежавання работы аддзяленняў — прамыя наступствы растучага крызісу.