У сувязі з Сусветным днём туалету, які адзначаўся 19 лістапада, СААЗ падкрэсліла ў заяве, апублікаванай на яе сайце, што «бяспечная санітарыя мае асноватворнае значэнне для здароўя і годнасці чалавека». «У кожнай суполцы гігіена абараняе людзей ад хвароб і засцерагае навакольнае асяроддзе», — канстатавала арганізацыя. «Тым не менш сёння 3,4 млрд чалавек жывуць без бяспечных санітарных умоў. Кожны год 1,4 млн чалавек паміраюць з-за недастатковага доступу да вады, санітарыі і гігіены», — адзначаецца ў заяве.

Змяненне клімату ўскладняе праблему, працягнулі ў СААЗ. Паводле яе даных, паводкі і засухі пашкоджваюць сістэмы санітарыі і забруджваюць крыніцы вады, падвяргаючы «найбольш уразлівых людзей надзвычайнай рызыцы». Забеспячэнне даступнасці і прымальнага кошту туалетаў для ўсіх, у тым ліку людзей з абмежаванымі магчымасцямі, — гэта «не толькі разумная палітыка», але і «маральны абавязак», падкрэсліваюць у СААЗ, заклікаючы краіны інвесціраваць у дадзеную сферу і гарантаваць, каб «кожны чалавек, дзе б ён ні знаходзіўся, мог разлічваць на бяспечную санітарыю».

У 2013 годзе Генеральная Асамблея ААН зацвердзіла 19 лістапада ў якасці Сусветнага дня туалету. Адзначаць яго кожны год вырашылі менавіта таму, што такая для большасці з нас звычайная частка паўсядзённага жыцця застаецца недаступнай амаль палове чалавецтва. Дзень закліканы прыцягнуць увагу міжнароднай супольнасці да гэтай праблемы.