У сераду пасеяная пад 25-м нумарам Шнайдэр абыграла Сабаленку з лікам 3:6, 7:5, 6:0 за 2 гадзіны 12 хвілін на корце.

Паражэнне стала для беларускіі вельмі балючым, што адбілася на яе пасляматчавых каментарыях.

«Ніякіх думак, ніякіх эмоцый. Я хачу прама зараз скончыць з тэнісам. Паглядзім праз некалькі дзён, ці вярнуся я ў норму. У мяне былі вельмі добрыя магчымасці ў другім сэце. Я ўсё сапсавала, а потым яна дадала і згуляла выдатна. Я адчувала, што ментальна не зімагла аднавіцца пасля першага сета. Думаю, у гэтым была мая памылка», — прыводзіць словы Сабаленкі з прэс-канферэнцыі Tennis Majors.

Шнайдэр стала чацвёртай тэнісісткай з 1975 года, якой удалося выйграць у першай ракеткі свету ўсухую на турнірах Вялікага шлема. Раней гэта ўдавалася Штэфі Граф, Серэне Уільямс і Марыі Шарапавай.

Я не ведаю, калі ў апошні раз такое са мной здаралася — прайграць дзесяць геймаў запар. Думаю, ментальна я трапіла ў вельмі глыбокую, цёмную яму і проста не змагла вярнуцца ў звычайны стан. Магчыма, я занадта зацыкленая на тым, што ніколі не выйгравала турнір Вялікага шлема на гэтых пакрыццях, і гэта прымушае мяне зашмат думаць. Я павінна проста сесці і добра падумаць аб тым, што адбываецца ў мяне ў галаве ў гэтыя цяжкія моманты. Я даволі вопытны ігрок, я прайшла праз многа і шмат чаго пераадолела, і я проста павінна зразумець тую маленькую дэталь, якая часам у мяне не працуе — і, спадзяюся, я змагу яе пераадолець. Што нас не забівае, робіць нас мацнейшым, думаю. У нейкі момант я разбяруся ў сітуацыі, і мы вернемся яшчэ больш моцнымі, — дадала Сабаленка.

Шнайдэр упершыню згуляе ў паўфінале турніру Вялікага шлема, да гэтага найлепшым вынікам 22-гадовай тэнісісткі быў выхад у чацвёрты раунд US Open, на «Ралан Гарос» яна раней ніколі не праходзіла далей за другі раунд.