У вырашальным паядынку Сабаленка прайграла — 4:6, 7:5, 2:6. Сустрэча працягвалася 2 гадзіны 23 хвіліны. Алена Рыбакіна ўпершыню выйграла US Open, гэта яе трэці тытул на турнірах «Вялікага шлема», раней яна выйграла Уімблдон (2022) і Australian Open (2026). Усяго ў яе 14 перамог на прафесійных турнірах. У панядзелак, 14 верасня, Алена Рыбакіна ўпершыню ўзначаліць рэйтынг WTA, а Арына Сабаленка перамесціцца на другую пазіцыю. 

На шляху да цяперашняга фіналу Арына Сабаленка па чарзе перамагла калумбійку Камілу Асарыа (59-ы нумар сусветнага рэйтынгу) — 6:2, 6:4, расіянку Паліну Яцэнка (160) — 6:1, 6:1, узбекскую тэнісістку Камілу Рахімаву (92) — 6:3, 6:4, амерыканку Тэйлар Таўнсенд (96) — 6:4, 6:3, чэшку Лінду Носкаву — 7:6 (7:1), 3:6, 7:6 (10:7) і амерыканку Джэсіку Пегулу (3) — 7:5, 6:2. 

Да гэтага Арына Сабаленка тры разы запар гуляла ў фінале амерыканскага першынства: у 2023 годзе саступіла Коры Гаўф, а ў двух наступных вырашальных паядынках перамагла яшчэ дзвюх прадстаўніц ЗША — Джэсіку Пегулу і Аманду Анісімаву. У 2019 годзе Сабаленка і бельгійка Элізэ Мертэнс сталі пераможцамі ў парным разрадзе, абыграўшы ў фінальным матчы беларуску Вікторыю Азаранку і аўстралійку Эшлі Барці. У адзіночным разрадзе Вікторыя Азаранка тройчы дабіралася да фіналу (2012, 2013, 2020), але заўсёды саступала тытул суперніцам.

У фінале мужчынскага US Open другая ракетка планеты Аляксандр Звераў з Германіі будзе супернічаць з амерыканцам Бэнам Шэлтанам, у якога дзявятая пазіцыя ў сусветным рэйтынгу. Агульны прызавы фонд US Open — 2026 складае рэкордныя $108 млн, чэмпіёны ў мужчынскім і жаночым адзіночных разрадах атрымаюць па $5,5 млн, фіналісты запрацуюць па $2,8 млн.