Беларуская тэнісістка Арына Сабаленка ў трэці раз стала пераможцай турніру WTA-1000 Mutua Madrid Open. 3 мая ў фінале першая ракетка планеты абыграла амерыканку Коры Гаўф — 6:3, 7:6 (7:3), паведамляе БелТА.
У першай партыі беларуска цалкам кантралявала ход ігры, здзейсніла два эйсы, выйграла тры падачы суперніцы і дапусціла ўсяго адну двайную памылку на сваіх падачах. У другім сэце амерыканка зайграла значна мацней, вяла 5:3, але Сабаленка знайшла ў сабе сілы змяніць сітуацыю і здолела вырваць перамогу на тай-брэйку. Сустрэча працягвалася 1 гадзіну 40 хвілін.
На шляху да фіналу яна па чарзе перамагла расійскую тэнісістку Ганну Блінкову (76-ы нумар сусветнага рэйтынгу) — 6:3, 6:4, бельгійку Элізе Мертэнс (28) — 3:6, 6:2, 6:1, амерыканку Пейтан Стэрнс (44) — 6:2, 6:4 і ўкраінскіх тэнісістак Марту Касцюк (24) — 7:6, 7:6 і Эліну Світоліну (17) — 6:3, 7:5.
Для Арыны Сабаленка гэта трэцяя перамога на грунтавых кортах іспанскай сталіцы.
Да гэтага яна станавілася чэмпіёнкай у 2021 і 2023 гадах, а год таму саступіла ў вырашальным матчы польцы ізе Свёнтэк, якая на гэты раз прайграла ў паўфінале Коры Гаўф. Зараз у актыве Сабаленкі 20 перамог на турнірах пад эгідай WTA.
Сёння ў вырашальным паядынку ў мужчын Брытанскі тэнісіст Джэк Дрэйпер (6) будзе супернічаць з нарвежцам Касперам Руудам (15).
