У матчы другога раунда дзеючая чэмпіёнка US Open перайграла расійскую тэнісістку Паліну Яцэнку, якая займае 160-е месца ў рэйтынгу WTA, — 6:1, 6:1. Паядынак працягваўся ўсяго 54 хвіліны. У 1/64 фіналу Сабаленка перамагла калумбійку Камілу Асорыя (59-ы нумар сусветнага рэйтынгу) — 6:2, 6:4, а ў трэцім раундзе будзе сапернічаць з узбекскай тэнісісткай Камілай Рахімавай (92). 

Арына Сабаленка тры разы запар гуляла ў фінале амерыканскага першынства: у 2023 годзе яна саступіла амерыканцы Коры Гаўф, а ў двух наступных вырашальных паядынках перамагла яшчэ дзвюх прадстаўніц ЗША — Джэсіку Пегулу і Аманду Анісімаву. У 2019 годзе Сабаленка і бельгійка Элізе Мертэнс сталі пераможцамі ў парным разрадзе, абгуляўшы ў фінальным матчы беларуску Вікторыю Азаранку і аўстралійку Эшлі Барці. У адзіночным разрадзе Вікторыя Азаранка тройчы дабіралася да фіналу (2012, 2013, 2020), але заўсёды саступала тытул саперніцам. 

Асноўны этап US Open-2026 завершыцца ў Нью-Йорку 13 верасня. Яго агульны прызавы фонд складае рэкордныя $108 млн, чэмпіёны ў мужчынскім і жаночым адзіночным разрадзе атрымаюць па $5,5 млн. Год таму пераможцам мужчынскага турніру стаў іспанскі тэнісіст Карлас Алькарас.