У матчы другога раунда першая ракетка планеты абгуляла ў двух сэтах амерыканскую тэнісістку Макартні Кеслер, якая займае 57-е месца ў сусветным рэйтынгу, — 6:1, 7:6 (11:9). У другой партыі беларуска саступала 2:5, потым здолела перавесці гульню на тай-брэйк і ў выніку дабілася поспеху. У Сабаленка сем эйсаў і ўсяго дзве двайныя памылкі. Паядынак доўжыўся 1 гадзіну 40 хвілін. У стартавай сустрэчы Сабаленка без асаблівых праблем перайграла сербку Тэадору Коставіч (184-ы нумар рэйтынгу WTA) — 6:2, 6:3, а ў 1/16 фіналу яе саперніцай будзе прадстаўніца Латвіі Алена Астапенка (31). 

Напярэдадні яшчэ адна беларуска Ірына Шымановіч у 1/64 фіналу ўступіла ў трохсэтавым паядынку швейцарскай тэнісістцы Вікторыі Галубіч (62) — 2:6, 6:2, 1:6. Шымановіч прабілася ў асноўную сетку Уімблдона, перамогшы ў кваліфікацыі канадку Кэтрын Себаў, чэшку Дамініку Шалкаву і бельгійку Грэт Мінен.

Фінал жаночага адзіночнага разраду 139-га па ліку Уімблдонскага турніру адбудзецца 11 ліпеня, а на дзень пазней пройдзе вырашальны паядынак у мужчын. Агульны прызавы фонд цяперашніх спаборніцтваў складае рэкордныя 62,4 млн фунтаў стэрлінгаў. Пераможцы ў адзіночных разрадах у жанчын і мужчын заробяць па 3,6 млн. Год таму чэмпіёнамі сталі полька Іга Свёнтэк і італьянец Янік Сінер.