Мінулай ноччу першая ракетка свету сустракалася з чэшскай тэнісісткай Ліндай Насковай, якая займае 14-е месца ў сусветным рэйтынгу, і ўпэўнена перамагла ў дзвюх партыях — 6:3, 6:4. У вырашальным паядынку саперніцай беларускі будзе прадстаўніца Казахстана Алена Рыбакіна (3-і нумар рэйтынгу WTA).

На цяперашнім турніры Арына Сабаленка таксама перамагла японку Хінэме Сакацуме (132) — 6:4, 6:2, румынку Жаклін Крысціян (35) — 6:4, 6:1, японскую тэнісістку Наомі Осаку (16) — 6:2, 6:4 і прадстаўніцу Канады Вікторыю Мбока (10) — 7:6 (7:0), 6:4. 

Спаборніцтвы ў Індыян-Уэлсе завершацца 15 сакавіка. У фінальным матчы мінулага года Арына Сабаленка ўступіла расійскай тэнісістцы Міры Андрэевай, а ў вырашальным паядынку 2023 года прайграла прадстаўніцы Казахстана Алене Рыбакінай. У 2012 і 2016 гадах пераможцай гэтага турніру станавілася беларуска Вікторыя Азаранка.