Беларуская спартсменка Анастасія Салас стала пераможцай у мнагаборстве на міжнародным турніры па мастацкай гімнастыцы на прызы алімпійскай чэмпіёнкі Марыны Лобач, паведамляе БелТА.
У агульнай складанасці за практыкаванні з абручом, мячом, стужкай і булавамі Салас набрала 121,85 бала. Амаль на тры ачкі Анастасія абышла лідара нацыянальнай каманды, медалістку Алімпійскіх гульняў Аліну Гарнаська. Трэці вынік у мнагаборстве паказала яшчэ адна наша спартсменка Дар’я Ткачова (109,40). На месцах з чацвёртага па шостае размясціліся беларускі Ніколь Леўта, Анастасія Трафімава і Ганна Кандрашына. За перамогу ў самым прэстыжным відзе праграмы Салас атрымала імянную статуэтку Марыны Лобач, падрыхтаваную Прэзідэнцкім спартыўным клубам.
Таксама 18 кастрычніка былі вызначаны прызёры ў мнагаборстве ў трох іншых узроставых катэгорыях. Сярод юніёрак да 15 гадоў перамогу атрымала наша Кіра Бабкевіч, другой стала яе суайчынніца Маргарыта Журовіч, бронзу ўзяла расіянка Кіра Копцева. У прэ-юніёрак да 13 гадоў тройку склалі беларускі Ксенія Еўдакімава, Ксенія Бандарэнка і Вера Канапацкая. У дзяўчынак да 11 гадоў лепшай аказалася Карына Багданава з Расіі, серабро — у нашай Ульяны Красняковай.
У нядзелю на міжнародным турніры на прызы Марыны Лобач адбудуцца фіналы ў асобных практыкаваннях. Уваход на трыбуны Палаца мастацкай гімнастыкі вольны.
