Пра здарэнне паведаміў у сацсетцы Х дзейны лідар паўднёваамерыканскай краіны Яманду Орсі. Паводле яго слоў, Мухіка быў не толькі прэзідэнтам, але таксама актывістам, прыкладам і лідарам.

«Мы будзем па табе вельмі сумаваць, дарагі стары. Дзякуй за ўсё, што ты нам даў, і за вялікую любоў да нашага народа», — дадаў ён.

Некалькі месяцаў таму Мухіка паведаміў, што дыягнаставаны ў яго рак стрававода распаўсюдзіўся на іншыя органы і не паддаецца лячэнню.

Тады ж ён развітаўся з суайчыннікамі.

Пасля смерці палітыка ўрад Уругвая абвясціў жалобу да 16 мая.

Хто такі Хасэ Мухіка?

Хасэ Мухіка ўзначальваў Уругвай з 2010 па 2015 год і атрымаў за гэты час мянушку «самы бедны прэзідэнт».

Да моманту выбрання на высокую пасаду ў яго ва ўласнасці быў толькі Volkswagen Beetle 1987 года выпуску. Калі палітыку прапанавалі прадаць машыну за $1 млн, той адмовіўся, патлумачыўшы, што тады яму будзе няма на чым вазіць свайго трохлапавага сабаку.

Мухіка ахвяраваў амаль увесь свой прэзідэнцкі заробак на дабрачыннасць, пакідаючы сабе толькі дзясятую частку ($1250).

«Мне цалкам хапае гэтых грошай, павінна хапаць, таму што даходы многіх уругвайцаў нашмат ніжэйшыя», — казаў ён.

Яшчэ Мухіка адмовіўся жыць у прэзідэнцкай рэзідэнцыі, у яго не было «Борта № 1». Замест гэтага Уругвай купіў выратавальны верталёт з медыцынскім абсталяваннем.

Пасля сыходу з пасады Мухіка адмовіўся і ад пенсіі.