Беларуская тэнісістка Аляксандра Сасновіч (114-ы нумар сусветнага рэйтынгу) прабілася ў асноўную сетку турніру катэгорыі WTA-500 у аўстралійскім Брысбене з прызавым фондам $1,2 млн, паведамляе БелТА.
У паядынку другога круга кваліфікацыі беларуска за дзве гадзіны адолела ў трохсэтавым паядынку прадстаўніцу Узбекістана Марыю Цімафееву (141) — 2:6, 6:3, 6:2. 2 студзеня ў стартавым кваліфікацыйным матчы Аляксандра Сасновіч упэўнена перайграла ў двух сэтах балгарскую тэнісістку Вікторыю Томаву (131) — 6:2, 6:2.
Асноўны этап Brisbane International пройдзе з 4 да 11 студзеня. Год таму гэты турнір выйграла першая ракетка планеты беларуска Арына Сабаленка, якая перамагла ў фінальным матчы расійскую тэнісістку Паліну Кудэрметаву.
