Міністр працы і сацыяльнай абароны Наталля Паўлючэнка адзначыла, што даходы бюджэту фонду ў 2026 годзе сфарміраваны з улікам асноўных параметраў прагнозу сацыяльна-эканамічнага развіцця. «Плануем атрымаць Br39 млрд (гэта плюс Br3, 8 млрд да ўзроўню бягучага года), тэмп росту — амаль 111 %. Асноўная крыніца даходаў класічная — страхавыя ўзносы работадаўцаў і працуючых грамадзян (амаль 93 %). Расходы бюджэту фонду — Br38,5 млрд (плюс 5,7 млрд да ўзроўню гэтага года), тэмп росту — 117,3 %, з іх больш за 80 % — гэта пенсіі», — праінфармавала яна. 

Намеснік старшыні Пастаяннай камісіі Савета Рэспублікі Нацыянальнага сходу Рэспублікі Беларусь па эканоміцы, бюджэце і фінансах Віктар Ананіч падкрэсліў, што бюджэт накіраваны на пашырэнне асноўнай мэтавай задачы — забяспечыць сацыяльныя гарантыі беларускіх грамадзян у выглядзе выплаты пенсіі і дапамог. «Пачынаючы з 2021 года прасочваецца станоўчая тэндэнцыя змяншэння долі фарміравання даходнай часткі бюджэту фонду субвенцый з рэспубліканскага бюджэту з 7,1 % у 2021 годзе да 5 % у 2026-м з адначасовым павелічэннем долі ўзносу на дзяржаўнае сацыяльнае страхаванне з 91,4 % у 2021 годзе да 93 % у 2026-м. Структура расходаў, запланаваных на 2026 год, адносна бягучага года, змянілася ў частцы фінансавання мерапрыемстваў. З 2026 года мерапрыемствы па забеспячэнні занятасці насельніцтва будуць фінансавацца з рэспубліканскага бюджэту. Доля сродкаў, якія будуць накіраваны на выплату пенсій, складаецца ў 80,7 %. Значную частку грашовых сродкаў (18 %) плануецца накіраваць на выплату дапамог», — канстатаваў ён. 

Паводле слоў намесніка старшыні, цяпер на розных пляцоўках абмяркоўваецца праект Праграмы сацыяльна-эканамічнага развіцця Рэспублікі Беларусь на 2026—2030 гады. «Адным з яго прыярытэтаў з’яўляецца развіццё чалавечага патэнцыялу. У якасці мэтавых задач для яго дасягнення вызначана адпаведнасць гарантый сацыяльнай абароны насельніцтва, у тым ліку за кошт забеспячэння росту пакупніцкай здольнасці пенсій па ўзросце на базе росту рэальных грашовых даходаў насельніцтва», — дадаў Віктар Ананіч.