«Усё і не пералічыш»

На думку парламентарыя, падтрымцы сем’яў, мацярынства і дзяцінства ў нашай краіне ўдзяляецца дастатковая ўвага:

— Я нават скажу як шматдзетны бацька, у якога ўжо чацвёра дзяцей: сёння ёсць і сямейны капітал, і падтрымка дзяцей-інвалідаў, арганізавана бясплатнае харчаванне і праезд — усё і не пералічыш. Выступаючы ў працоўных калектывах, я гляджу на тыя выгоды, якія сёння наша дзяржава дае сем’ям, у тым ліку шматдзетным, і думаю: нічога сабе, я толькі гэтым скарыстаўся, калі ў мяне з’явілася чацвёртае дзіця!

Дзяржава робіць усё магчымае, каб мужчына ствараў сям’ю і браў на сябе адказнасць за жанчыну, а таксама за дзяцей, якія будуць прадаўжальнікамі яго роду, лічыць Сяргей Мялешкін. Дэмаграфічная бяспека, пазначаная адным з ключавых прыярытэтаў Праграмы сацыяльна-эканамічнага развіцця краіны на пяцігодку, і шэраг іншых праграм накіраваны на тое, каб дзяржава матывавала беларусаў да стварэння сем’яў і менавіта шматдзетная сям’я стала нормай у нашым грамадстве, падкрэслівае ён:

— Вядома, акцэнт робіцца на малыя гарады. І кіраўнік дзяржавы на пастаянным асабістым кантролі трымае ініцыятыву «Адзін раён — адзін праект», каб ствараліся перспектыўныя рабочыя месцы і пункты росту, фарміравалася добрая сацыяльная інфраструктура. І сёння заедзь у Мёры, Шаркаўшчыну — убачыш новыя раёны, як мадэрнізуюцца старыя прадпрыемствы і ствараюцца новыя. Каб прыцягнуць моладзь у рэгіёны, неабходны ўстойлівы інтэрнэт, сучасная інфраструктура, добрая зарплата.

«Дэмаграфічнае пытанне — гэта нацыянальная бяспека краіны»

Гаворачы аб сямейных каштоўнасцях, сенатар нагадвае, што Беларусь — сацыяльна-арыентаваная дзяржава:

— І маючы зносіны з моладдзю, важна паказваць асабісты прыклад і расказваць пра тое, што ў Беларусі робіцца для падтрымкі і захавання інстытута сям’і. Мы бачым, як на нашу моладзь уплываюць заходнія СМІ і інтэрнэт-рэсурсы, таму сёння вельмі важна працаваць з ёй. Мы часта праводзім сустрэчы ў установах адукацыі, нацэльваем маладую аўдыторыю на стварэнне сям’і і нараджэнне дзяцей. Расказваем, што дэмаграфічнае пытанне — гэта нацыянальная бяспека краіны. Трэба разумець: чым больш дзяцей, тым менш у старасці будзе адчувацца сацыяльная адзінота. Сям’я гуртуе, вызначае далейшыя мэты, прыносіць радасць і надае сілы для новых здзяйсненняў як у прафесійнай сферы, так і ў грамадскай дзейнасці.

У апошнія дзесяцігоддзі ў інфармацыйнай прасторы мы сутыкнуліся з прапагандай заходніх плыняў, якія супрацьпастаўляюцца традыцыйнай сям’і. І наша дзяржава рэагуе на такія выпады, укараняе механізмы, якія дазваляюць прыцягваць да адказнасці зламыснікаў — адпаведныя арганізацыі і грамадзян, падкрэслівае парламентарый:

— Тут, вядома, вельмі выразна неабходна падключацца нам усім, дарослым, працаваць са сваімі дзецьмі. Таму што абмежаваць іх ад таго патоку інфармацыі, які сёння знаходзіцца ў інтэрнэце, немагчыма. Трэба фарміраваць каштоўнасці ў моладзі на тым, на чым выраслі мы, прытрымліваючыся сапраўдных каштоўнасцяў. Для гэтага трэба выкарыстоўваць усе пляцоўкі і актывізавацца на ўсіх узроўнях, пачынаючы з дзіцячых садкоў і школ і заканчваючы вышэйшымі навучальнымі ўстановамі, рознымі прадпрыемствамі і арганізацыямі. І не трэба саромецца, трэба казаць пра гэта, як ёсць, каб наша моладзь, якая і так занадта інфармаваная, правільна расстаўляла прыярытэты.

«Сумяшчаць выхаванне дзяцей і паспяховую работу»

Сяргей Мялешкін таксама закрануў тэму духоўна-маральных арыенціраў:

— У першую чаргу іх адназначна фарміруе сям’я. Калі ў сям’і сёння трансліруецца, што не трэба спяшацца выходзіць замуж альбо ажаніцца, а тым больш нараджаць дзяцей, маўляў, трэба пажыць для сябе, то так у выніку і атрымліваецца. Сям’я — падмурак любой дзяржавы.

Закранаючы тэму гендарнай роўнасці, парламентарый адзначае, што ў беларускім грамадстве часцей за ўсё мужчына выконвае функцыю здабытчыка, а жанчына — захавальніцы хатняга ачага:

— І выхаванне дзяцей таксама часта ў большым аб’ёме кладзецца менавіта на жанчыну. Але жыццё змяняецца. Калі параўноўваць з 90-мі гадамі мінулага стагоддзя, мы сталі на парадак лепей жыць, у нас з’явілася больш магчымасцяў, пастаянна расце заработная плата. І сёння жанчыны адчуваюць гэта, атрымліваюць фінансавую незалежнасць, бачаць, што яны могуць сумяшчаць і выхаванне дзяцей, і паспяховую работу, займаць кіруючыя пасады.

У якасці прыкладу Сяргей Мялешкін прывёў трох жанчын з Віцебшчыны — старшынь райвыканкамаў:

— Гэта складаная праца, але яны спраўляюцца з ёй і з’яўляюцца прыкладам для астатніх жанчын.

Спыніўся сенатар і на філасофскім пытанні — што такое любіць?

— Гэта не значыць толькі глядзець адзін на аднаго. Любіць — гэта глядзець у адным напрамку. Каб створаная сям’я вызначала мэты і ўпэўнена, разам ішла да іх. А хто будзе здабытчыкам у гэтых адносінах — жанчына ці мужчына — дарослыя людзі самі разбяруцца.

Данііл ХМЯЛЬНІЦКІ
Фота ТГ-канала 
Савета Рэспублікі