У Авальнай зале адбылася ўрачыстая цырымонія ўзнагароджання пераможцаў конкурсу на лепшую творчую работу па асвятленні дзейнасці Палаты прадстаўнікоў.
Як звярнуў увагу Старшыня Палаты прадстаўнікоў Ігар СЕРГЯЕНКА, большасць работ на конкурс была заяўлена рэгіянальнымі масмедыя. «Гэта асабліва актуальна ў кантэксце тых задач, якія паставіў перад журналістамі кіраўнік дзяржавы на форуме медыйнай супольнасці Беларусі ў Магілёве ў маі мінулага года», — адзначыў ён.
Звяртаючыся да прысутных у Авальнай зале, сярод якіх — дэпутаты, кіраўнікі і супрацоўнікі СМІ, члены Маладзёжнага савета пры Палаце прадстаўнікоў, спікер нагадаў гісторыю гэтага гістарычнага месца, дзе нараджаюцца законы і пішацца гісторыя нашай дзяржавы.
«У ліпені 1938 года ў гэтай зале адбылася першая сесія Вярхоўнага Савета БССР, — праінфармаваў Ігар Сергяенка. — Тут у 1939 годзе было прынята рашэнне аб уз’яднанні беларускага народа і ўключэнні Заходняй Беларусі ў склад Беларускай ССР. Адсюль у 1941 годзе дэпутаты Вярхоўнага Савета першага склікання сыходзілі на фронт, у партызанскія атрады і гарадское падполле. Кожны пяты з іх загінуў ці знік без вестак».
Памяць аб сваіх гераічных папярэдніках шануюць сённяшнія дэпутаты — у фае Авальнай залы ўвекавечана памяць аб 94 дэпутатах Вярхоўнага Савета, якія загінулі ў гады Вялікай Айчыннай вайны.
Старшыня Палаты прадстаўнікоў падкрэсліў, што ў Авальнай зале бярэ пачатак палітычная біяграфія Аляксандра Лукашэнкі як народнага дэпутата. У далейшым, па словах спікера, з гэтай трыбуны Прэзідэнт звяртаўся да беларускага народа і Парламента са штогадовымі пасланнямі.
Ігар Сергяенка звярнуў увагу на тое, што цырымонія ўшанавання пераможцаў конкурсу на лепшую творчую работу па асвятленні дзейнасці Палаты прадстаўнікоў адбываецца напярэдадні святкавання 80-годдзя Вялікай Перамогі. «У гады Вялікай Айчыннай вайны друкаванае слова было магутнай зброяй у барацьбе з ворагам, крыніцай сілы і натхнення людзей на подзвіг, несла праўду аб тым, што адбывалася на франтах, — падкрэсліў ён. — У цяперашні час Беларусь зноў апынулася ў эпіцэнтры барацьбы за перадзел свету. І ва ўмовах вострага ідэалагічнага супрацьстаяння менавіта журналістыка выконвае адну з ключавых функцый па абароне інфармацыйнага суверэнітэту нашай краіны і прасоўванні мірнага, стваральнага парадку дня».
Звяртаючыся да медыйнай супольнасці, спікер канстатаваў, што парламентарыі, якія працуюць з журналістамі ў адным звязку, высока шануюць іх працу, уклад, які яны ўносяць у падтрыманне дыялогу паміж дзяржавай і грамадствам, забеспячэнне народнага адзінства. Старшыня Палаты прадстаўнікоў выказаў удзячнасць кіраўнікам СМІ, усім, хто працуе ў сферы сродкаў масавай інфармацыі, за сумленнасць, вернасць прафесіі, сапраўдную грамадзянскую пазіцыю, патрыятызм, увагу да парламенцкай дзейнасці і эфектыўнае супрацоўніцтва. «Наша канструктыўнае ўзаемадзеянне прыняло сістэмны характар, і стала плённым», — рэзюмаваў Ігар Сергяенка.
Вераніка КАНЮТА.
Фота БелТА.
- Дыпломам Ι ступені конкурсу на лепшую творчую работу «Палата прадстаўнікоў у фокусе СМІ» ў намінацыі «Лепшы аўтарскі матэрыял у рэспубліканскіх друкаваных СМІ і сеткавых выданнях» узнагароджана рэдактар аддзела палітыкі рэдакцыі газеты «Звязда» Вераніка Канюта. За прафесійнае майстэрства, аб’ектыўнае і ўсебаковае асвятленне дзейнасці Палаты прадстаўнікоў журналісту аб’яўлена Падзяка Старшыні Палаты прадстаўнікоў Нацыянальнага сходу.
