Як удакладняецца на сайце аўкцыённага дома, першапачаткова лот ацэньваўся ў 40–80 тыс. еўра. Выніковая сума продажу, якая ўключае камісію і падаткі, больш чым у чатыры разы перавысіла верхнюю мяжу папярэдняй ацэнкі.

Сервіз быў выраблены ў 1840 годзе ў Санкт-Пецярбургу майстрамі Карлам Іаганам Тэгельстэнам і Генрыхам Аўгустам Лангам для ювелірнай фірмы Nicholls & Plincke, якая пастаўляла вырабы расійскаму імператарскаму двару. Набор складаецца з самавара, кафейніка, чайніка, цукарніцы з вечкам, малочніка, падсітка, шчыпцоў для цукру і вялікага авальнага падноса. Усе прадметы выкананы з пазалочанага серабра 875-й пробы.

Як адзначае Aguttes, асаблівую каштоўнасць сервізу надае захаванасць амаль поўнага камплекту, бо падобныя рарытэты расійскага імператарскага двара XIX стагоддзя рэдка з’яўляюцца на аўкцыёнах у такім складзе.