Свабодная эканамічная зона «Мінск» і мексіканскі індустрыяльны парк «Талука» падпісалі пагадненне аб супрацоўніцтве. Цырымонія падпісання адбылася ў час візіту беларускай дэлегацыі, арганізаванага Мінскім аддзяленнем Беларускай гандлёва-прамысловай палаты, з дзелавой місіяй у Мексіку, паведамілі БелТА ў прэс-службе сталічнай СЭЗ.
Дакумент накіраваны на пашырэнне гандлёвага і інвестыцыйнага супрацоўніцтва, уключаючы ўдзел у сумесных праектах, дзелавых мерапрыемствах, гандлёвых і інвестыцыйных місіях. Першы намеснік кіраўніка адміністрацыі СЭЗ «Мінск» Сяргей Бубенька правёў перагаворы з прадстаўнікамі мексіканскіх кампаній, прэзентаваў інвестыцыйны патэнцыял свабоднай эканамічнай зоны і напрамкі для развіцця двухбаковага супрацоўніцтва.
Праграмай візіту прадугледжаны ўдзел у Нацыянальным з’ездзе дэлегацый, сектараў і прамысловых аддзяленняў Нацыянальнай палаты перапрацоўчай прамысловасці Мексікі (CANACINTRA), наведванне індустрыяльнага парка «Талука» і лагістычнага хаба.
Як рэзюмавалі ў сталічнай СЭЗ, бізнес-мерапрыемствы накіраваны на ўмацаванне дзелавых сувязей паміж Беларуссю і Мексікай і арыентаваны на прыцягненне мексіканскіх інвестыцый у эканоміку нашай краіны.
