Гаворка ідзе аб пухлінах, якія развіваюцца ў міжінтэрвальны перыяд — паміж планавымі мамаграфічнымі абследаваннямі. Такія новаўтварэнні лічацца найбольш небяспечнымі: яны хутка растуць, часта маскіруюцца пад шчыльныя тканіны і не заўсёды адрозныя на стандартных двухмерных здымках.

Гарвардскія вучоныя пратэставалі работу ШІ на масіве з 1,4 тысячы тамасінтэзаў — аб’ёмных рэнтгенаўскіх выяў малочнай залозы. У выбарцы было 224 выпадкі злаякасных пухлін, якія ўрачы не распазналі. Штучны інтэлект дакладна выявіў 73 з іх — гэта 32% ад усіх прапушчаных дыягназаў.

Дацэнт Гарвардскага універсітэта Маніша Баль падкрэсліла, што ШІ не толькі ідэнтыфікаваў пухліны, але і вызначыў іх межы з высокай дакладнасцю:

«Гэта падкрэслівае патэнцыял штучнага інтэлекту як інструмента другога меркавання ў дыягностыцы рака грудзей».

Аўтары даследавання ўпэўненыя, што ўкараненне ШІ ў працэдуры маммографіі можа павысіць дакладнасць выяўлення рака і адначасова скараціць колькасць абследаванняў, не зніжаючы іх эфектыўнасці. Асабліва гэта важна для дыягностыкі хуткарослых формаў рака, якія ўяўляюць найбольшую пагрозу для жыцця.