«Шкода была ацэненая куратарам Луўра ў 88 млн еўра. Надзвычай уражальная сума», — сказала пракурор, дадаўшы пры гэтым, што яна ўсё роўна не супастаўная з гістарычнай шкодай.

Паводле яе слоў, злачынцы не заробяць такія грошы, калі яны захочуць пераплавіць выкрадзеныя каштоўнасці.

Пракурор пацвердзіла, што на месцы злачынства дзейнічалі чатыры чалавекі, але дапусціла магчымасць таго, што працавала цэлая група, якая дапамагала ім здзейсніць крадзеж. Справу расследуюць каля сотні следчых.

Раней агенцтва Reuters са спасылкай на экспертаў паведамляла, што французская паліцыя зможа затрымаць злачынцаў, якія выкралі каштоўнасці з музея, але скрадзенае можа быць незваротна страчана. 

19 кастрычніка злачынцы праніклі ў Луўр, выкарыстоўваючы пад’ёмнік для доступу на другі паверх, узламалі вітрыны і выкралі восем прадметаў, у тым ліку інкруставаную брыльянтамі брошку, якая належала жонцы Напалеона III, імператрыцы Яўгеніі, а таксама каралі і дыядэмы. Рабаўнікі таксама спрабавалі скрасці карону імператрыцы, але выпусцілі яе, уцякаючы.