У Маскве ў музеі «АТАМ» 23 чэрвеня адбылося падвядзенне вынікаў сёмага сезона міжнароднага навукова-асветнага праекта «Ледакол ведаў», арганізаванага пры падтрымцы «Расатама». Былі аб’яўлены імёны пераможцаў, якія ўжо ў жніўні адправяцца ў экспедыцыю да Паўночнага полюса на атамным ледаколе «50 гадоў Перамогі». Сярод іх — беларускі школьнік, навучэнец гімназіі нумар 1 Віцебска імя Ж.І.Алфёрава Ціхан Карняенка.

«Ледакол ведаў — гэта навукова-асветная платформа, якая дае шанц кожнаму ўдзельніку не толькі пабываць у Арктыцы, але і даведацца шмат новага аб атамнай энергетыцы, высокіх тэхналогіях у цэлым, паразмаўляць са спецыялістамі „Расатама“. Я спадзяюся, што атрымаю вялікі багаж ведаў і вопыту. Місія прадстаўляць Беларусь на маючай адбыцца экспедыцыі — вялікі гонар і адказнасць для мяне», — адзначыў ён.

У міжнародным трэку конкурсу за магчымасць апынуцца ва ўнікальнай арктычнай экспедыцыі спаборнічалі каля 5 тыс. таленавітых школьнікаў ва ўзросце ад 14 да 16 гадоў з Беларусі, Бангладэш, Балівіі, Бразіліі, Венгрыі, В’етнама, Арменіі, Егіпта, Індыі, Інданезіі, Казахстана, Кітая, Кыргызстана, Манголіі, М’янмы, Намібіі, Руанды, Сербіі, Танзаніі, Турцыі, Узбекістана, ПАР. Рэкордная колькасць заявак на ўдзел паступіла з Казахстана (945 удзельнікаў), Кыргызстана (827 удзельнікаў) і Беларусі (464 удзельнікі).

Міжнародны адбор стартаваў 5 мая і прайшоў у тры этапы. На першым этапе ўдзельнікі адказвалі на пытанні навуковай віктарыны, дзе маглі праверыць свае веды ў галіне прыродазнаўчых навук, прарыўных тэхналогій, атамнай энергетыкі і пакарэння Арктыкі. Другі этап уключаў серыю вэбінараў ад экспертаў атамнай галіны. Удзельнікам расказвалі аб перспектыўных рашэннях «Расатама», у тым ліку аб тэхналогіях, якія прымяняюцца для бяспечнага і ўстойлівага развіцця арктычнага суднаходства, а таксама аб ролі атамнай энергетыкі ў будучым сусветнай эканомікі і навукі. Па суме балаў за абодва этапы ў кожнай краіне былі адабраны дзесяць фіналістаў, якія прайшлі ў заключны этап і прадставілі творчыя работы на тэму «Як атамныя тэхналогіі мяняюць свет сёння».

Работы фіналістаў ацэньвала міжнароднае журы, у склад якога ўвайшлі прадстаўнікі атамнай галіны, навукі, адукацыі, арктычнага парадку дня і навуковых камунікацый.

«Такія ініцыятывы, як „Ледакол ведаў“, адыгрываюць вельмі важную ролю ў фарміраванні цікавасці моладзі да атамных тэхналогій і навукова-тэхнічных прафесій. Яны даюць школьнікам магчымасць убачыць навуку не як нешта складанае і далёкае, а як жывую, сучасную і перспектыўную сферу, у якой можна рэалізаваць сябе і ўнесці ўклад у будучыню. Асабліва каштоўна, што праект спалучае асвету, практычнае знаёмства з галіной і моцны матывацыйны складнік: удзельнікі пачынаюць лепш разумець, наколькі запатрабаваны веды, інжынернае мысленне і міжнароднае супрацоўніцтва ў сучасным свеце. Упэўнены, што менавіта такія праекты дапамагаюць маладым людзям свядома выбіраць свой прафесійны шлях і натхняюць новае пакаленне на займанне навукай і інжынерыяй», — сказаў член міжнароднага журы «Ледакол ведаў — 2026», амбасадар расійскай ядзернай адукацыі, студэнт Обнінскага інстытута атамнай энергетыкі НДЯУ МІФІ Чанта Кхын.

На борце атамнага ледакола запланавана насычаная навукова-асветная праграма з удзелам расійскіх і замежных экспертаў атамнай галіны: лекцыі, майстар-класы, навуковыя эксперыменты і іншыя інтэрактыўныя мерапрыемствы.

Навукова-асветны праект «Ледакол ведаў» арганізаваны пры падтрымцы дзяржкарпарацыі «Расатам». Ён накіраваны на папулярызацыю прыродазнаўча-навуковых дысцыплін і тэхналогій атамнай галіны, пошук і падтрымку таленавітых і адораных дзяцей, развіццё іх здольнасцей і прафарыентацыю. Спіс пераможцаў міжнароднага адборачнага конкурсу апублікаваны на афіцыйным сайце праекта — goarctic.energy.