Прыём дакументаў для залічэння ў першыя класы дзяцей, якія пражываюць у мікрараёне, прымацаваным да ўстановы адукацыі, праходзіць з 12 чэрвеня па 15 жніўня. Бацькам будучых першакласнікаў неабходна падаць заяву на імя дырэктара школы, медыцынскую даведку пра здароўе дзіцяці і пасведчанне аб нараджэнні.

У гэтыя ж тэрміны кіраўніком установы адукацыі або асобай, якая выконвае яго абавязкі, прымаюцца заявы на свабодныя месцы ад бацькоў дзяцей, якія не пражываюць у прымацаваным мікрараёне. Прыём такіх дзяцей на свабодныя месцы ў школы і гімназіі пройдзе ў парадку чарговасці рэгістрацыі заяў ад іх законных прадстаўнікоў. Астатнія дакументы, у выпадку калі будзе прынята станоўчае рашэнне аб прыёме дзіцяці ў школу, трэба падаць з 17 па 28 жніўня. 

Варта памятаць, што дзеці, якія пражываюць у мікрараёне ўстановы адукацыі, маюць пераважнае права пры паступленні ў гэту ўстанову ў першы клас.

«Каля 82 тыс. першакласнікаў сядуць за парты беларускіх школ у новым навучальным годзе. У параўнанні з мінулым годам ніякіх змен у парадку прыёму дакументаў няма. Міністэрствам адукацыі, установамі зроблена ўсё, каб гэты парадак быў празрыстым і зразумелым для бацькоў. Месцаў у школах хопіць усім. Важна памятаць, што ўсе ўстановы адукацыі працуюць па адзіных праграмах і вучэбных планах. На сайтах школ і гімназій штодня будзе абнаўляцца інфармацыя аб колькасці пададзеных дакументаў і заяў на свабодныя месцы. Таксама на сайтах ёсць інфармацыя аб колькасці дзяцей, якія пражываюць у мікрараёне, замацаваным за установай адукацыі, кантрольныя лічбы прыёму. Правёўшы найпростыя матэматычныя разлікі, можна вызначыць, ці будзе свабоднае месца для залічэння вашага дзіцяці або варта адразу вызначыцца з установай адукацыі па месцы жыхарства», — адзначыла начальнік упраўлення агульнай сярэдняй адукацыі — намеснік начальніка Галоўнага ўпраўлення агульнай сярэдняй і дашкольнай адукацыі Міністэрства адукацыі Ірына Каржова.