Сямейная палітыка ў Беларусі шматгранная і ўключае некалькі ключавых кампанентаў. «Перш за ўсё гэта сацыяльна-эканамічная падтрымка сем’яў, у якіх нараджаюцца дзеці, а таксама выбудаваная сістэма адукацыі і аховы здароўя. Важнейшы аспект — падтрымка працоўнай дзейнасці і стварэнне пэўных прэферэнцый праз працоўнае заканадаўства для працуючых грамадзян. Безумоўна, асаблівая ўвага ўдзяляецца падрастаючаму пакаленню: вядзецца актыўная выхаваўчая і інфармацыйная работа, накіраваная на прывіванне традыцыйных сямейных каштоўнасцей і пераемнасці пакаленняў», — расказала Юлія Берднікава.

Ключавая задача сацыяльнай палітыкі заключаецца ў стварэнні спрыяльных умоў для жыццядзейнасці і развіцця кожнай сям’і ў краіне. Праз вырашэнне гэтай задачы кожная сям’я атрымлівае магчымасць паспяхова рэалізоўваць свае асноўныя функцыі, адзначыла яна. «Па-першае, гэта дэмаграфічная функцыя, гэта значыць нараджэнне дзяцей, таму што беларусаў павінна станавіцца больш. Па-другое, выхаваўчая функцыя, паколькі сям’я з’яўляецца базай, асновай і сілай кожнага чалавека, дзе закладваюцца каштоўнасці, устоі і ўстаноўкі на развіццё і навучанне. Па-трэцяе, гэта эканамічная функцыя, паколькі ад дабрабыту і развіцця кожнай асобнай сям’і прама залежыць паспяховы стан і працвітанне ўсёй Беларусі», — падкрэсліла намеснік міністра.

У сувязі з гэтым шматдзетныя сем’і знаходзяцца ў асаблівым фокусе ўвагі дзяржавы і фактычна выведзены на ўзровень нацыянальнай каштоўнасці, дадала яна. Пры нараджэнні трэцяга або наступнага дзіцяці сям’я набывае адпаведны статус, і для яе пачынае дзейнічаць праграма «Сямейны капітал». Гэта праграма, якая стартавала ў 2015 годзе, прадугледжвае выплату ў памеры 35 тыс. рублёў, што залічваецца на банкаўскі дэпазіт. Гэтыя сродкі сям’я можа ў далейшым накіраваць на паляпшэнне жыллёвых умоў, атрыманне адукацыі дзецьмі або набыццё медыцынскіх паслуг.

Істотныя прэферэнцыі прадугледжаны і ў вырашэнні жыллёвых пытанняў. Размова ідзе аб асаблівых умовах крэдытавання: крэдыт прадастаўляецца на 40 гадоў пад 1%. Больш таго, з нараджэннем дзяцей дзяржава дапамагае пагасіць запазычанасць: пры нараджэнні трэцяга дзіцяці пагашаецца 75% крэдыту, а пры нараджэнні чацвёртага — 100%, што з’яўляецца вельмі важкай падтрымкай. Дадаткова дзейнічаюць падатковыя льготы, а ў сістэме адукацыі навучанне і харчаванне дзіцяці ў школе на ўвесь перыяд навучання прадастаўляюцца бясплатна для дзяцей са шматдзетных сем’яў, не гаворачы ўжо аб шэрагу іншых прэферэнцый.

«Такія дзяржаўныя інвестыцыі поўнасцю апраўданы. Сёння статыстыка цвёрда сведчыць, што кожнае чацвёртае дзіця ў краіне выхоўваецца менавіта ў шматдзетнай сям’і», — рэзюмавала Юлія Берднікава.