Перад пунктам пропуску «Брэст» з вечара 24 верасня пачалі скаплівацца транспартныя сродкі. Карэспандэнты БелТА пагаварылі з тымі, хто ў чарзе чакае ўезду ў Польшчу.

Аўтобусы сталі пад’язджаць да пункта пропуску «Брэст» за тры гадзіны да адкрыцця Польшчай мяжы.

Уладзіслаў працуе вадзіцелем. Напярэдадні закрыцця Польшчай мяжы ён таксама быў у чарзе. Тады аказаўся ў ліку шчасліўчыкаў, якія паспелі перасекчы з пасажырамі мяжу. А вось пасля гэтага ўзнікла нявызначанасць: разумення, калі польскі бок адновіць работу сваіх пунктаў пропуску, ні ў кога не было.

«Бачыце, яны супакоіліся і вырашылі, што трэба нанава адкрываць (пункты пропуску. — Заўвага БЕЛТА). Таму што, я думаю, губляюць яны нямала ад таго, што пазакрывалі. Вось і ўсё. Але ўвогуле, гэта не па-суседску — закрываць граніцу», — выказаў меркаванне мужчына. Да пункта пропуску «Брэст» ён прыехаў 24 верасня бліжэй да 21.00. «Забралі пасажыраў з вакзала. Не ведаю, чаго чакаць. Можна за гадзіну заехаць, а можна і за 12. Складана сказаць, як будзе», — заўважыў вадзіцель.

Андрэй разам з сябрамі і калегамі з Гродна разглядаў некалькі шляхоў, каб патрапіць у Варшаву. Спачатку яны планавалі ехаць цягніком праз Калінінград, але пасля знайшлі больш бюджэтны варыянт: аўтобус праз Латвію. Яны спадзяваліся, што хутка перасякуць мяжу, але іх чаканні не апраўдаліся. Там чакаць трэба было двое-трое сутак. Аднак у гэты ж дзень таварышы расказалі Андрэю, што едуць у Брэст — мяжу абяцаюць адкрыць. «Мы стаім тут з дзвюх гадзін ночы, гавораць, хутка адкрыюць. Мы чакаем, спадзяёмся», — дадаў Андрэй.

Яшчэ ў адным аўтобусе едзе мінчанін Аляксей. Яго канчатковы пункт прызначэння — Іспанія. Адпачынак быў даўно запланаваны. «Узяў білет транзітам праз Латвію, але мне патэлефанавалі і сказалі, што Польшча адкрывае мяжу і аўтобус будзе перанесены. І вось я тут», — расказаў малады чалавек. Ён дадаў, што яму крыўдна з-за таго, што Польшча закрыла мяжу з Беларуссю. «Пакутуюць жа самыя звычайныя людзі, не нехта іншы — мы. Складана дабірацца да родных, да блізкіх, ды проста на адпачынак. Але што зрабіць? Спадзяюся, што хутка на гэты раз пройдзем мяжу. Разлічваю да раніцы быць у Варшаве», — спадзяецца Аляксей.

Як паведамлялася, у Дзяржаўны пагранічны камітэт Беларусі Памежная варта Польшчы даслала афіцыйнае апавяшчэнне аб адкрыцці 25 верасня з 1.00 па беларускім часе закрытых амаль два тыдні таму пунктаў пропуску.