Выстаўка-кірмаш рэгіёнаў Беларусі і Расіі 27 чэрвеня адкрыецца на пляцоўцы Мінскага міжнароднага выставачнага цэнтра BELEXPO для мінчан і гасцей сталіцы, расказалі БелТА арганізатары.

Маштабную экспазіцыю з удзелам беларускіх і расійскіх вытворцаў, рамеснікаў, прадстаўнікоў бізнесу і сферы гандлю можна будзе наведаць з 11:00.

«Будуць прадстаўлены ўнікальная касметыка з Пскова, закускі і джэркі ад вытворцаў з Уладзімірскай вобласці, рамесная і арт-прадукцыя ад Пензенскай рамеснай палаты, рыбная прадукцыя, ювелірныя вырабы і ўпрыгажэнні з Калінінградскай вобласці, пернікі, хусткі і рускія народныя паясы, музычныя інструменты з Тулы, гжэльскія фарфоравыя вырабы ад легендарнай фабрыкі з Маскоўскай вобласці, віно і дэсертныя напіткі з Краснадарскага края, а таксама тысячы найменняў прадукцыі і дэкору, прапаноў ад рамеснікаў і майстроў мастацтваў з Расіі», — адзначылі арганізатары.

Расійскі бок прадставяць вытворцы і рамеснікі з Уладзімірскай, Калінінградскай, Маскоўскай, Пензенскай, Пскоўскай, Тульскай абласцей і Краснадарскага края. Запланавана зона для дзелавых перагавораў прадстаўнікоў Рэспублікі Башкортастан.

Беларуская частка будзе прадстаўлена ўсімі абласцямі і горадам Мінскам. У складзе беларускай экспазіцыі выстаўкі-кірмашу буйнейшыя прадстаўнікі прамысловасці, навукі, сельскай гаспадаркі і харчавання, галіновыя холдынгі і аб’яднанні, заводы і фабрыкі, прыватныя вытворцы і спецыялізаваныя вытворчасці.

«Знакамітае марожанае з Кобрына, бабруйскі зефір, ёгурты, любімыя многімі намазкі і мясныя пасты з Брэста, вафельныя і бісквітныя вырабы з Віцебска, вядомую кандытарскую прадукцыю з Гомельскай вобласці, згушчонку і ласункі, мяса-малочную прадукцыю, тэкстэль і галантарэю, тавары для дзяцей і галіновыя распрацоўкі ўбачаць на стэндах госці выстаўкі. Кожны наведвальнік зможа знайсці прадукцыю на свой густ і цану», — дадалі арганізатары.

Выстаўка-кірмаш прадоўжыць серыю мерапрыемстваў у рамках XIII Форуму рэгіёнаў Беларусі і Расіі. Яна будзе працаваць ад 11.00 да 18.00. Уваход на мерапрыемства свабодны.