Калі ў кватэры ёсць хатнія жывёлы, іх варта вывесці з памяшкання: няпрошаны госць і гадаванец могуць траўмаваць адзін аднаго. Таксама не варта спрабаваць збіць кажана падчас палёту — гэта можа прывесці да траўмаў жывёлы.

Спецыялісты раяць дачакацца, пакуль кажан сядзе на якую-небудзь паверхню, пасля чаго акуратна змясціць яго ў скрынку або кантэйнер з вечкам. «У цёплы час года выпускаць яго на волю лепш вечарам ці ноччу. У халодны час рабіць гэта непажадана. Трэба звярнуцца ў Мінскі цэнтр рэабілітацыі рукакрылых па тэлефоне +375 29 213-92-57. Там кажана змесцяць на зімоўку ў спецыяльную лядоўню, а вясной выпусцяць у натуральнае асяроддзе», — расказалі ў камітэце.

Разам з тым у камітэце падкрэслілі, што кажана нельга браць голымі рукамі — неабходна выкарыстоўваць шчыльныя пальчаткі, напрыклад, будаўнічыя або скураныя. У жывёлы вострыя зубы, яе ўкус можа быць балючым, акрамя таго, кажан можа быць пераносчыкам небяспечных захворванняў.