МНС папярэджвае: катэгарычна нельга кідаць запалкі, непатушаныя недакуркі або любое тлеючае рыззё. Разводзіць вогнішча дазволена выключна на спецыяльна абсталяваных пляцоўках і забараняецца — у густых зарасніках, хваёвым маладняку, непасрэдна пад кронамі дрэў, а таксама ў моцны вецер. Строга забаронена выпальваць сухую траву на лясных палянах і прылеглых да лясных масіваў тэрыторыях. І, канешне, ні ў якім разе нельга пакідаць распалены агонь без нагляду. Парушэнне гэтых патрабаванняў прыводзіць да адміністрацыйнай адказнасці са штрафам да дванаццаці базавых велічынь.

Пры развядзенні агню ў лесе неабходна выконваць шэраг абавязковых умоў. Вогнішча варта размяшчаць на бяспечнай адлегласці ад палатак і іншага турыстычнага рыштунку, а месца пад яго трэба старанна расчысціць ад травы і сухога лісця. Побач заўсёды варта трымаць ёмістасць з вадой, каб заліць вогнішча перад тым, як пайсці. Дарэчы, перад паходам у лес ратавальнікі раяць правяраць яго клас пажарнай небяспекі — уся інфармацыя даступная на інтэрактыўнай карце МНС і сайце Міністэрства лясной гаспадаркі.

Што рабіць, калі вы сталі сведкам пажару ў лесе? Перш за ўсё варта выклікаць ратавальнікаў па нумарах 101 ці 112. Калі агонь толькі пачынаецца, можна паспрабаваць збіць полымя зялёнымі галінкамі або закідаць яго грунтам. У выпадку ж, калі пажар ужо распаўсюдзіўся, галоўнае — як мага хутчэй пакінуць небяспечную зону. Рухацца неабходна насустрач ветру ці, па магчымасці, перпендыкулярна распаўсюджванню агню, прыкрыўшы рот і нос мокрай тканінай. Старайцеся выйсці на дарогу, шырокую прасеку, паляну, да берага ракі або ў адкрытае поле. Прытрымліванне гэтых нескладаных, але жыццёва важных правіл захавае не толькі прыроду, але і чалавечыя жыцці. 

Аміна НАЗАРАВА
Фота з адкрытых крыніц