Ягады, агародніна і садавіна — пра тое, што здаюць жыхары Магілёўскай вобласці, БелТА расказаў намеснік начальніка ўпраўлення прамысловасці, нарыхтовак і знешнеэканамічнай дзейнасці Магілёўскага аблспажыўсаюза Арцём Прыжкоў.
«На сённяшні дзень у нас актыўна пачаўся сезон нарыхтоўкі яблыкаў для прамысловай перапрацоўкі — ужо нарыхтавана больш за 600 тон. Працягваецца сезон дзікарослых ягад і грыбоў. Чарніц здадзена больш за 75 тон, лісічак — каля 7 тон», — пералічыў намеснік начальніка ўпраўлення.
Практычна падышоў да канца перыяд нарыхтоўкі ягад, якія вырошчваюць жыхары рэгіёна на сваіх падворках і прысядзібных участках. «Ужо нарыхтавана больш за 8 тон чорных парэчак, больш за 1 тону чырвоных парэчак. Таксама здавалі вішню і чарэшню — атрымалася каля 5 і 3,5 тоны, буякоў атрымалася 4 тоны, — сказаў Арцём Прыжкоў. — Стала карыстацца папулярнасцю алыча, здаюць і слівы».
У рэгіёне 14 жніўня пачаўся сезон збору брусніц — ужо нарыхтавана практычна 1 тона, а ў верасні пачнецца збор журавін.
«Працуем і з усімі відамі гародніны: агуркі, таматы, капуста, бульба — гэта найбольш запатрабаванае», — падкрэсліў намеснік начальніка ўпраўлення.
У параўнанні з аб’ёмамі нарыхтоўкі летась, у гэтым сезоне вышэйшая ўраджайнасць яблыкаў. Як падкрэсліў спецыяліст, гэта звязана з тым, што не было моцных замаразкаў. Багатыя на ўраджай у гэтым годзе і чарніцы. «У мінулым годзе мы нарыхтавалі ўсяго толькі тону. У параўнанні з гэтым сезонам розніца каласальная», — расказаў ён.
Уся прадукцыя ў далейшым паступае на рэалізацыю ва ўласную рознічную сетку, аб’екты грамадскага харчавання, пастаўляецца на перапрацоўчыя прадпрыемствы краіны.
