Беларусбанк забароніць прывязваць чужыя карты

З 1 кастрычніка ў мабільным дадатку M-Belarusbank больш нельга будзе прывязаць да свайго профілю карту іншага чалавека. Калі такія карты ўжо прывязаны, іх рэкамендуюць выдаліць да гэтай даты. У адваротным выпадку дадатак можа перастаць працаваць з усімі картамі, уключаючы ўласную.

Пры гэтым самі карты і рахункі не блакуюцца — імі па-ранейшаму можна разлічвацца ў крамах. Каб захаваць магчымасць дапамагаць сваяку з фінансавымі аперацыямі, трэба аформіць дадатковую карту на сваё імя. Зрабіць гэта можа ўладальнік рахунку ў любым аддзяленні банка.

Электронная чарга на граніцы атрымае тэрмін дзеяння

З 1 кастрычніка браніраванне ў электроннай чарзе на граніцы будзе дзейнічаць 30 каляндарных дзён. За гэты час трэба альбо падаць аўтамабіль у зону чакання, альбо прайсці рэгістрацыю анлайн, альбо аформіць вяртанне грошай.

Дровы можна будзе заказаць онлайн

З 1 кастрычніка заказаць дровы для ацяплення можна будзе праз сайт Міністэрства лясной гаспадаркі, не выязджаючы ў лясніцтва. Пра гэта ў эфіры «Першага інфармацыйнага» паведаміў кіраўнік ведамства Сяргей Ульдзіновіч.

Падатковыя дакументы з чужым подпісам не прымуць

У Міністэрстве па падатках і зборах папярэджваюць: з 1 кастрычніка электронныя дакументы, падпісаныя асобай, якая не з’яўляецца законным або ўпаўнаважаным прадстаўніком плацельшчыка, прымацца не будуць. Такія дакументы не будуць апрацоўвацца.

Частка выдаткаў па інтэрнатах ляжа на жыхароў

З 1 кастрычніка мяняецца парадак кампенсацыі выдаткаў на ўтрыманне дзяржаўных інтэрнатаў. Змены прадугледжаны пастановай Савета Міністраў № 440 ад 31 жніўня 2026 года.

Галоўнае: крыніца аплаты цяпер залежыць ад статусу жыхара і даты засялення. Калі работнік бюджэтнай арганізацыі засяліўся да 1 кастрычніка альбо яго прафесія ўваходзіць у пералік, зацверджаны выканкамам, выдаткі пакрываюцца з мясцовага бюджэту. Для тых, хто засяліцца пазней і не патрапіць у гэты пералік, крыніцай становяцца ўласныя сродкі. Наймальнік можа дапамагчы, але толькі добраахвотна — абавязковых адлічэнняў не ўводзіцца.

Для грамадзян, якія маюць патрэбу ў сацыяльнай абароне (інваліды, ветэраны, сем’і з непаўналетнімі дзецьмі, сіроты), выдаткі на пражыванне па-ранейшаму цалкам пакрываюцца з мясцовых бюджэтаў.

Кампенсацыі падлягаюць уборка калідораў, кухняў і холаў, электраэнергія для асвятлення месцаў агульнага карыстання і ліфтаў, аплата працы работнікаў інтэрнатаў, абслугоўванне пажарнай і ахоўнай сігналізацыі, відэаназірання і добраўпарадкаванне тэрыторыі.

У Мінску пройдуць суботнікі

У кастрычніку ў сталіцы традыцыйна праходзіць месячнік па добраўпарадкаванні. Суботнікі запланаваны на 3, 10, 17, 24 і 31 кастрычніка. Да іх далучацца камунальныя службы, працоўныя калектывы, студэнты і гараджане.

Кантралёры будуць правяраць білеты па новых правілах

З 5 кастрычніка працэдура праверкі білетаў застанецца ранейшай, але кантралёры будуць выкарыстоўваць відэарэгістратары інакш. Яны абавязаны папярэджваць пасажыраў пра тое, што вядзецца відэа- і аўдыёзапіс. Пры праверцы запіс павінен быць бесперапынным. Асобна прапісаны патрабаванні аб абароне персанальных даных пасажыраў.

Ягор ЧУРЫК