Спаборніцтвы ў 25-метровым басейне праходзяць у амерыканскім Кармелі. У першы дзень этапу Шымановіч выступаў на дыстанцыі 100 метраў брасам. Беларус стаў трэцім у папярэднім заплыве і прайшоў далей з чацвёртым часам сярод 39 удзельнікаў (57,17 сек.). Фінал з удзелам Ільі адбудзецца ў ноч на 11 кастрычніка па мінскім часе.

Таксама ў пятніцу адразу ў двух відах праграмы была прадстаўлена Настасся Шкурдай. У адборы на дыстанцыі 100 метраў комплексным плаваннем наша спартсменка замкнула топ-15 з рэзультатам 1 мін. 00,79 сек., а ў кваліфікацыі на пяцьдзясят метраў на спіне брэстаўчанка заняла 16-е месца, справіўшыся за 27,40 сек.

Першы этап Кубка свету па плаванні на кароткай вадзе ў ЗША завершыцца 13 кастрычніка. У розыгрышы 2024 года беларускія спартсмены заваявалі 17 узнагарод — адну залатую, чатырнаццаць сярэбраных і дзве бронзавыя.