Калегія Еўразійскай эканамічнай камісіі (ЕЭК) зацвердзіла план па ўдасканаленні права Еўразійскага эканамічнага саюза ў сферы функцыянавання сістэм электронных пашпартоў транспартных сродкаў (шасі), электронных пашпартоў самаходных машын і іншых відаў тэхнікі. Пра гэта БелТА паведамілі ў прэс-службе ЕЭК.
«Дакумент сфарміраваны па выніках маніторынгу інфармацыйнага ўзаемадзеяння адміністратара з нацыянальнымі аператарамі сістэм электронных пашпартоў, у тым ліку на падставе прапаноў, якія паступілі ад упаўнаважаных органаў краін ЕАЭС», — адзначылі ў прэс-службе.
«Мерапрыемствы плана накіраваны на ўдасканаленне рэестраў і электронных дакументаў аб ацэнцы адпаведнасці, гарманізацыю звестак электронных пашпартоў з дакументамі аб ацэнцы адпаведнасці, а таксама ўрэгуляванне пытанняў перадачы мытных звестак. План носіць рамачны характар. На дадзеным этапе вызначаецца толькі пералік актаў Саюза, якія патрабуюць карэкціроўкі. Канкрэтны змест адпаведных змяненняў будзе дадаткова прапрацоўвацца сумесна з упаўнаважанымі органамі дзяржаў-членаў», — растлумачыў член Калегіі (міністр) па тэхнічным рэгуляванні ЕЭК Аляксандр Субоцін.
Запланаваныя мерапрыемствы намечана рэалізаваць да II квартала 2027 года. Гэта, па словах міністра ЕЭК, дазволіць ліквідаваць складанасці, якія ўзнікаюць пры абмене звесткамі электронных пашпартоў, выяўленыя падчас маніторынгу інфармацыйнага ўзаемадзеяння адміністратара з нацыянальнымі аператарамі.
