Удзел у спаборніцтвах шаставікоў разам з Волкавым прынялі дзевяць расійскіх атлетаў. Для перамогі Мацвею спатрэбіліся ўсяго два скачкі — у дэбютным выхадзе ў сектар беларус справіўся з вышынёй 5,5 м, пасля чаго з першай спробы пакарыў 5,72 м. Ніводны з сапернікаў нашага спартсмена не паляцеў вышэй за пяць з паловай метраў. Раней у сёлетнім чэрвені Волкаў стаў мацнейшым на фестывалі лёгкай атлетыкі ў Цверы, а таксама заняў другое месца на турніры «Дзень скачкоў» у Маскве.

Гэта вікторыя стала для беларускай каманды другой на Кубку Расіі 2025 года — напярэдадні лепшы вынік у штурханні ядра паказаў Алег Тамашэвіч. Акрамя таго, 21 чэрвеня за прызы ў кіданні молата змагалася наша Анастасія Маслава: беларуска адправіла снарад на 65,25 м і размясцілася чацвёртай. Выніку бронзавай медалісткі Маслава саступіла менш за паўметра.

У нядзелю, 22 чэрвеня, у сектары і на дарожкі ў Жукоўскім выйдуць нашы Алена Дубіцкая (штурханне ядра), Яўген Багуцкі (кіданне дыска), Арцём Калачоў (800 м), Дзмітрый Іваненка, Аляксандр Шусцік і Таццяна Шабанава (усе — 3000 м з перашкодамі).