Сляды жыццядзейнасці выхухалі былі заўважаныя ў басейне Сожа ўпершыню за апошнія 40 гадоў. Пра гэта паведамляе БелТА са спасылкай на навукова-практычны цэнтр НАН Беларусі па біярэсурсах.
Факт пражывання выхухалі рускай (Desmana moschata L.) у басейне Сожа пацверджаны навукоўцамі.
Вядучы навуковы супрацоўнік Ірына Крышчук сумесна з расійскімі калегамі з Окскага дзяржаўнага прыроднага біясфернага запаведніка выявіла сляды гэтага звярка падчас палявых работ у пойменных вадаёмах ракі Сож у межах Магілёўскай і Гомельскай абласцей.
«На абследаваных вадаёмах упершыню за апошнія 40 гадоў зафіксаваныя сляды жыццядзейнасці віду: нары і кармавыя столікі з рэшткамі ракавін прэснаводных малюскаў», — паведамілі ў НПЦ па біярэсурсах.
Аналізуючы разнастайнасць тыпаў сховішчаў у спалучэнні з устойлівай кармавой базай, спецыялісты схільныя да меркавання, што ў абследаваных пойменных вадаёмах ракі Сож могуць быць захаваны невялікія лакальныя папуляцыі гэтага віду.
