На падрыхтоўку лагера «Нёман» было выдзелена 58 950 рублёў: 10 750 рублёў са сродкаў Рэспубліканскага цэнтра па аздараўленні і санаторна-курортным лячэнні насельніцтва на бягучы рамонт першага паверха корпуса, 20 800 рублёў з раённага бюджэту, 19 700 рублёў з пазабюджэтных сродкаў і 7700 рублёў спонсарскай дапамогі. Лагер прыняты камісіяй, рамонтныя работы завершаны, і да пачатку сезона лагер поўнасцю быў гатовы прымаць дзяцей, расказала дырэктар.

«Гэтым летам па плане адпачнуць 550 дзяцей за пяць змен. Лагер невялікі, але гэта дае магчымасць бачыць кожнае дзіця, ведаць яго асабіста. Фактычная ўмяшчальнасць — 132 дзіцяці, — адзначыла Таццяна Ажгірэвіч. — З сацыяльна неабароненых катэгорый у лагеры асабліва плануецца аздаравіць 284 чалавекі: 13 дзяцей з асаблівасцямі развіцця, 180 са шматдзетных сем’яў, 50 дзяцей-сірот, 41 дзіця, якое знаходзіцца на ўліку. Для кожнай катэгорыі распрацаваны індывідуальныя праграмы, працуюць сацыяльны педагог і псіхолаг, наладжана сувязь са школамі. У дзіцячым калектыве гэтыя дзеці — паўнацэнныя ўдзельнікі, нічым не адрозніваюцца ад равеснікаў».

На адно дзіця ў дзень выдзяляецца каля 8 рублёў з улікам узросту. «Меню пераглядаем штогод, улічваючы запыты дзяцей і бацькоў. Повары накіроўваюцца са школ, таму шмат чаго залежыць ад якасці прыгатавання. Дзеці любяць смачна паесці: у меню ёсць піца, гарачыя бутэрброды, біфштэксы, курыныя палачкі, фрукты, агародніна», — заўважыла дырэктар.

Гаворачы аб кадрах, Таццяна Ажгірэвіч падкрэсліла: «Сёння лагер укамплектаваны на 100 працэнтаў: педагагічныя кадры, харчаблок, тэхнічны персанал. Склад мяняецца, але сфарміравана добрая каманда. Супрацоўнічаем з БДПУ імя Максіма Танка і БДУ: на пяць змен прыедуць пяць студэнцкіх атрадаў».

Паводле яе слоў, у Год беларускай жанчыны ў лагеры рэалізуецца праграма «Крок да поспеху». «Кожная змена тэматычная: экалагічнае выхаванне, здаровы лад жыцця, культура бяспечнай жыццядзейнасці. Па матрыцы „дзень за днём“ і інструктыўна-метадычным пісьме распрацаваны мерапрыемствы. Запрашаем паспяховых жанчын-кіраўнікоў, праводзім тэматычныя конкурсы і квесты, каб дзеці разумелі каштоўнасць жанчыны ў грамадстве», — падкрэсліла Таццяна Ажгірэвіч.