Удзел у кваліфікацыі суперспрынта прынялі 68 біятланістак, якія прабеглі 4,5 км з двума заходамі на стрэльбішчы. У фінал прабілася лепшая трыццатка, у тым ліку пяцёра з васьмі стартаваўшых беларусак. Вырашальны забег прайшоў у фармаце мас-старту на 7,5 км з чатырма агнявымі рубяжамі. Найлепшая з нашых спартсменак Дзінара Смольская дапусціла два промахі і заняла шостае месца.

У топ-20 таксама фінішавалі беларускі Ксенія Варабей (15-я) і Ганна Сола (17-я), Алена Кулак стала 22-й, Ірына Шаклеіна — 27-й. Іх сяброўкі па камандзе Вікторыя Шашкова, Аліна Зайцава і Ганна Песцерава спыніліся на стадыі кваліфікацыі. Перамогу ў гэтым відзе праграмы атрымала расіянка Наталля Шаўчэнка, тройку прызёраў дапоўнілі Настасся Халілі і Ульяна Чарапанава. 

Медалі ў мужчынскім суперспрынце будуць разыграны заўтра, адборачны забег стартуе ў 10.00 па мінскім часе, фінальны — у 12.00. У чацвер на чэмпіянаце Расіі па біятлоне адбудзецца змешаная эстафета. 21 сакавіка ў Цюмені пройдуць мужчынскі мас-старт і жаночая эстафета, а 22 сакавіка — жаночы мас-старт і мужчынская эстафета.