Аб гэтым заявіў першы намеснік прэм’ер-міністра Беларусі Мікалай Снапкоў у час цырымоніі адкрыцця Пуцзянскага інавацыйнага форуму ў Шанхаі, паведамілі БЕЛТА у прэс-службе ўрада.

«Ёсць добрыя вынікі ў мікраэлектроніцы, оптыцы, прыборабудаванні. Нашы навукова-вытворчыя цэнтры ствараюць канкурэнтаздольную прадукцыю з высокім дабаўленым коштам, запатрабаваную на сусветных рынках, — адзначыў першы віцэ-прэм’ер. — У галіне біятэхналогій, абапіраючыся на магутную акадэмічную школу, мы актыўна ўкараняем інавацыі ў медыцыне і сельскай гаспадарцы. Зялёныя тэхналогіі — адзін са складальнікаў нашай дзяржаўнай палітыкі».

Мікалай Снапкоў таксама зачытаў прывітальны адрас Прэзідэнта Беларусі Аляксандра Лукашэнкі ўдзельнікам цырымоніі адкрыцця 18-га Пуцзянскага інавацыйнага форуму.

Пуцзянскі інавацыйны форум — адно з вядучых міжнародных мерапрыемстваў у галіне інавацый у КНР, праводзіцца з 2008 года. Удзельнікі — палітыкі, вучоныя, прадстаўнікі бізнес-супольнасці. Тэматыка — актуальныя пытанні прадпрымальніцтва, фінансаў, будучага навуковага патэнцыялу, культуры, міжнародных інавацыйных тэндэнцый, перспектыў развіцця эканомікі і прамысловых тэхналогій. Арганізатары — Міністэрства навукі і тэхналогій КНР і Народны ўрад Шанхая. Беларусь прымае ўдзел у форуме ў статусе ганаровага госця.

Цэнтральным элементам беларускага ўдзелу ў форуме стала нацыянальная экспазіцыя, прадстаўленая двума ключавымі раздзеламі: «Распрацоўкі арганізацый Беларусі» і «Дасягненні кітайска-беларускага навукова-тэхнічнага супрацоўніцтва». Першая экспазіцыя дэманструе 50 перадавых распрацовак рэзідэнтаў тэхнапаркаў, Міністэрства аховы здароўя, Кітайска-беларускага індустрыяльнага парка «Вялікі камень» і арганізацый НАН Беларусі. У сферы «Інавацыйныя тэхналогіі ў АПК і харчовай прамысловасці» прадстаўлены такія ўнікальныя распрацоўкі, як аградроны і аўтатлушч; воблачная сістэма для аўтаматызацыі сельскагаспадарчых работ; навігацыйная сістэма аўтаматычнага ваджэння, створаная на базе кітайскага абсталявання і беларускага праграмнага забеспячэння. Напрамак «Медыцына і біятэхналогіі» таксама ўражвае распрацоўкамі, уключаючы проціпухлінныя сродкі, а таксама інавацыйныя рашэнні ў артапедыі.

У раздзеле «Лічбавыя тэхналогіі і штучны інтэлект» асаблівую ўвагу прыцягвае апаратна-праграмны мабільны комплекс, здольны аўтаматычна счытваць і правяраць сапраўднасць дакументаў, адбіткі пальцаў, распазнаваць тэкст і RFID-мікрасхемы. Прамысловы патэнцыял Беларусі будзе дэманстравацца ў раздзеле «Інавацыйныя тэхналогіі ў прамысловасці», дзе прадстаўлены ўзоры і прэзентацыі ў сферы металургіі, машына- і прыборабудавання, новых і кампазіцыйных матэрыялаў.

Другі раздзел экспазіцыі «Дасягненні кітайска-беларускага навукова-тэхнічнага супрацоўніцтва» наглядна дэманструе плён сумеснай работы. Адмысловае месца займае ініцыятыва «Будаўніцтва платформы — разам створым трывалы падмурак», у рамках якой прадстаўлена 13 праектаў.