У канцы лютага на Сонцы ўпершыню за чатыры гады цалкам зніклі ўсе плямы. Чакаецца, што такія падзенні актыўнасці, тыповыя для спаду пасля піка 25-га 11-гадовага цыкла ў 2024 годзе, будуць паўтарацца. Пра гэта расказалі расійскія спецыялісты Лабараторыі сонечнай астраноміі Інстытута касмічных даследаванняў (ІКД) РАН. 

«Сонца паступова вяртаецца ў зыходны стан дэпрэсіі, з якога яго не змагло вывесці нават з’яўленне адразу дзвюх актыўных груп», — гаворыцца ў паведамленні лабараторыі ў тэлеграм-канале.

Адна з іх поўнасцю страціла энергію і знаходзіцца на стадыі распаду. Навукоўцы мяркуюць, што пакінутая ад яе адна пляма будзе паглынута Сонцам на працягу 5–10 сутак.

Таксама на Сонцы бачны новы актыўны цэнтр 4379–4380. У момант выхаду з адваротнага боку ён выдаў серыю амаль з 20 выбліскаў, але «цалкам выдыхся» за пару сутак. Цяпер геамагнітная актыўнасць вызначаецца слаба ўзрушаным сонечным ветрам, на фоне чаго Kp-індэкс нязначна павышаны і часам выходзіць на «жоўты» ўзровень.

«У гісторыю сонечнай фізікі канец лютага — пачатак сакавіка 2026 года, здаецца, відавочна не трапяць. Хоць нейкае мінімальнае „жыццё“ на Сонцы пакуль ёсць. Зусім на дно актыўнасць пакуль не падае», — удакладнілі ў лабараторыі.