«Мы 28 кастрычніка плануем паездку на фестываль у Саранск. Выбралі „Трыбунал“, бо гэта спектакль з беларускай драматургіі. Імкнёмся паказаць за мяжой сваю нацыянальную ідэнтычнасць і культуру. Добры спектакль яшчэ і тым, што акцёры гавораць на мясцовым дыялекце. Пры гэтым расійскаму гледачу без перакладу будзе зразумелы сэнс», — расказалі ў БАТД. 

Трагікамедыя «Трыбунал» пастаўлена па п’есе беларускага драматурга Андрэя Макаёнка. Сюжэт разгортваецца ў гады Вялікай Айчыннай вайны, калі галава сямейства раптам становіцца на бок ворага. Яго жонка і дзеці ў жаху ад такой здрады. Гэта гісторыя пра сямейныя повязі, якія рвуцца пад цяжарам вайны, пра тое, на якія ахвяры могуць пайсці людзі дзеля выратавання блізкіх і свайго народа. У спектаклі тонка пераплятаюцца лубачны камізм узаемаадносін персанажаў з трагедыяй акупацыі. На Брэсцкай сцэне прэм’еру «Трыбунала» прадставілі ў чэрвені 2024 года.

Артысты Брэсцкага акадэмічнага тэатра драмы ў лістападзе выступяць на Рэспубліканскім фестывалі нацыянальнай драматургіі імя У. І. Дуніна-Марцінкевіча. Глядач у Бабруйску ўбачыць спектакль-рэквіем «Вера» па п’есе пісьменніцы і драматурга Зінаіды Дудзюк. Гэта гісторыя, заснаваная на рэальных падзеях, аб гераічнай барацьбе беларускага народа ў гады Вялікай Айчыннай вайны, аб мужнасці і адданасці, аб каштоўнасці памяці.

У гэтым сезоне трупа БАТД радуе аматараў тэатральнага мастацтва чарадой прэм’ер. Так, 22 кастрычніка свет убачыў спектакль-міраж «У пошуках Маленькага прынца» па матывах аповесці Антуана дэ Сэнт-Экзюперы. У пачатку лістапада жыхары Брэста прэзентуюць драматычную камедыю «Стомленая Венера» паводле твора драматурга Валянціна Краснагорава. У снежні ў тэатры абяцаюць парадаваць навагодняй казкай «Снежная каралева» па творы Ханса Крысціяна Андэрсана ў інсцэніроўцы Рэнаты Насібулінай.